Birgitta biður Jón afsökunar hafi orð hennar sært hann

Birgitta Jónsdóttir, þingflokksformaður Pírata, segist í Facebook-færslu biðja Jón Gunnarsson, formann atvinnuveganefndar þingsins, innilegrar afsökunar ef orð hennar hafi sært eða meitt hann. Hún ítrekaði þó skoðun sína að hann yrði maður með meiri ef hann bæði Björk Guðmundsdóttur opinberlega afsökunar á orðum sem hann lét falla um hana.

Birgitta greindi frá því á Facebook og í þingsal í gær að hún hefði nánast hafa þurft á áfallahjálp að halda vegna dónaskapar Jóns á meðan hún sat við hliðina á honum á síðasta þingi. „Eins og forseta er kunnugt sem og mjög mörgum þingmönnum sem ég talaði við, og meðal annars skrifstofustjóri þingsins líka, þá leið mér mjög illa þegar ég sat við hliðina á Jóni Gunnarssyni og gerði allt sem ég gat til að fá að vera flutt. Mig langaði oft ekki í vinnuna því mér leið svo illa við hliðina á þessum manni svo að það sé sagt og það vita margir,“ sagði hún.

Jón fór fram á að það við upphaf þingfundar í gærmorgun að forsætisnefnd þingsins myndi rannsaka ummæli Birgittu.

Margir hafa það meira skítt

Í Facebook-færslu Birgittu frá því í morgun segist hún vilja svo koma eftirfarandi á framfæri:

„Ég bað ítrekað um að fá að skipta um sæti á síðasta þingvetri og það vita allir hjá yfirstjórn þingsins vegna þess hvernig Jón hagaði sér gagnvart mér, stöðugt að skjóta í mann ónotum án nokkurs tilefnis. Það hefur nákvæmlega ekki neitt með pólitík að gera. Ég er með þykkan skráp og allt það, en ófyrirséð og stöðugt áreiti er þungbært þegar maður er fastur við hliðina á einhverjum í margra klukkutíma atkvæðagreiðslum. En mér er enginn vorkun, það hafa það margir miklu meira skítt en ég og þetta mál snýst ekki um mig heldur þær dylgjur sem þingmaðurinn viðhafði gagnvart Björk sem hann hefur ekki sýnt neina tilburði til að biðjast afsökunar á.“

Mikilvægari hlutir sem þarf að ræða

Sjálf segist hún hins vegar tilbúin að biðja Jón afsökunar ef hún hafi móðgað hann eða sært. „Hann væri maður með meiri ef hann bæði Björk Guðmundsdóttur opinberlega afsökunar. Jón Gunnarsson hér með bið ég þig innilegrar afsökunar á mínum hlut og ef orð mín hafa sært eða meitt þig. Ég ætla ekki með þetta inn í þingsal eins og þú gerðir í gær enda aðrir og mikilvægari hlutir sem þar þarf að ræða um,“ segir Birgitta í færslunni.