Wambach: Ég sá þig og fór að gráta | Myndband

Abby Wambach kvaddi bandaríska landsliðið í fótbolta eftir glæstan 14 ára feril í nótt þegar hún fékk heiðursskiptingu í kveðjuleiknum gegn Kína.

Wambach, sem skoraði 184 landsliðsmörk í 255 leikjum, fann ekki netmöskvana í lokaleiknum þrátt fyrir mikla hjálp frá liðsfélögum sínum.

Sjá einnig:Kveðjustund hjá engri venjulegri knattspyrnukonu

„Liðsfélagar mínir voru augljóslega að reyna að láta mig fá boltann en það er orðið frekar langt síðan ég var aðalstjarnan í liðinu. Ég elska samt liðsfélaga mína fyrir að reyna. Þessi leikur snerist ekki um úrslitin,“ sagði Wambach í viðtali við Julie Foudy, fyrrverandi landsliðsmann Bandaríkjanna, sem starfar í dag sem fótboltaspekingur hjá ESPN.

Wambach var tekin af velli á 70. mínútu og tóku þá við mikil fagnaðarlæti og faðmlög sem Wambach komst ágætlega í gegnum. Tilfinningarnar brustu svo út þegar inn í búningsklefa var komið.

Táraflóð inn í klefa

„Þetta var erfitt því maður verður að faðma alla liðsfélaga sína og þetta er bara of yfirþyrmandi. Ég er fegin að ég náði að halda andliti fyrir framan fólkið en þú sást mig baksviðs í búningsklefanum þar sem ég grét hraustlega,“ sagði Wambach en hvað orsakaði táraflóðið?

„Ef ég á að vera heiðarleg? Ég sá þig,“ sagði Wambach við Foudy og barðist við tárin, en Julie Foudy var búin að vera fjórtán ár í bandaríska landsliðinu þegar Wambach mætti til leiks árið 2001.

„Ég veit að Mia [Hamm] er hérna líka og þið allar. Ég var ein í búningsklefanum. Það er svo mikið af fólki hérna sem ég elska og hef fengið tækifæri til að þroskast með í gegnum lífið.“

„Þú varst ein af þeim fyrstu sem sýndi mér veginn og ég vona að ég hafi staðið mig nógu vel þannig næsta kynslóð haldi áfram að vinna. Það er það eina sem skiptir máli. Þetta lið á að vinna og ekki bara leiki heldur titla,“ sagði Wambach.

Byrjuð að breyta heiminum

Sjálf átti Foudy erfitt með sig eftir hólið frá Wambach og sagði: „Þú átt ekki að láta mig fara að gráta í viðtalinu.“ Hin eiturhressa Wambach svaraði um hæl: „Þú ert að spyrja fjandans spurninganna.“

Wambach er mikil baráttukona og jafnréttissinni og hefur lengi talað fyrir jafnrétti innan fótboltans. Nú hefur hún sett markið hærra og ætlar að berjast fyrir jafnrétti í öllu.

„Ég er nú þegar byrjuð. Ég er svo spennt fyrir því að tækla næstu áskorun og ég mun ekki hætta fyrr en jafnrétti gildir allstaðar í öllum greinum. Ég veit þetta er stórt markmið en ég er ekki hrædd,“ sagði Wambach.

Allt viðtalið má sjá með því að smella hér.