Vilja dæla sjó úr Perlu á morgun til að koma henni á flot

Vinna hefst síðdegis á morgun við að dæla sjó úr sanddæluskipinu Perlu, sem sökk í Reykjavíkurhöfn í gær, ef tillaga Björgunar ehf. verður samþykkt. Tillagan miðast við að skipið verði þétt eins og kostur er og sjó dælt úr skipinu til að lyfta því af hafsbotni.

Endanleg ákvörðun um aðgerðir verður tekin í fyrramálið, eftir að kafarar hafa skoðað skipið frekar. Verði tillaga Björgunar samþykkt og takist vel til er gert ráð fyrir að um sex klukkustundir taki að dæla úr skipinu.

„Það hefur verið unnið að því að þétta allar glufur í skipinu og síðan verða smíðaðir stálstokkar sem eru 7,5 metrar á hæð og þeir festir við lúgur,“ útskýrir Gísli Gíslason, hafnarstjóri Faxaflóahafna. „Ofan í þessa stokka er ætlunin að setja dælur og dæla úr þeim rýmum skipsins sem geta komið því á flot.“

Sjá einnig: Björgunarbáturinn losnaði ekki af Perlu

Samkvæmt tillögunni er áætlað að dæla 468 tonnum af sjó úr afturskipi Perlunnar og 247 tonnum úr framskipinu. Þá verði krani staðsettur á Ægisgarði sem á að tryggja stöðugleika skipsins þegar það lyftist frá botni.

„Þetta er auðvitað flókin aðgerð, en þess virði að sjá til hvort hún lukkist ekki,“ segir Gísli.

Gísli segist frekar gera ráð fyrir því að skipið verði frekar skoðað við Ægisgarðinn í kjölfarið, frekar en að það verði aftur dregið í slipp. Hann telur að rúmlega þrjátíu manns komi alls að aðgerðinni.