Kannast ekki við lýsingar leigu­bíl­stjóra

Þetta kemur fram í skriflegu svari frá Guðjóni Helgasyni upplýsingafulltrúa Isavia. Leigubílstjóri sem ræddi við Vísi í síðustu viku sagði stöðuna á leigubílastæðinu við Keflavíkurflugvöll enn minna á villta vestrið þvert á loforð forsvarsmanna Isavia um að gæsla á stæðinu yrði bætt. Hann sagði gæsluna af skornum skammti auk þess sem einungis væri um að ræða unga menn sem leigubílstjórinn sagði ekki ráða við ástandið.

Þjónustan gangi mun betur

„Það er mat okkar á Keflavíkurflugvelli að þjónusta leigubíla gangi nú mun betur fyrir sig en til dæmis á fyrri hluta síðast árs. Bæði eru samskipti við leigubílstjóra nú almennt betri og þeim tilvikum sem við höfum þurft að gera athugasemdir við störf þeirra hefur fækkað,“ segir í skriflegu svari Isavia.

Frá því í byrjun maí hafi félagið verið með einn starfsmann á vakt hverju sinni. Viðkomandi hafi það hlutverk að aðstoða gesti flugvallarins við að nýta leigubílaþjónustuna.

„Og stuðla að því að þeir fái góða þjónustu. Viðkomandi er á vakt á leigubílasvæðinu á háannatíma en er til taks þess utan gerist þess þörf.“

Bílstjórum í banni fækkað

Segir í svarinu að þó það sé ekki hlutverk Isavia að hafa eftirlit með starfsemi leigubílstjóra þá hafi félagið fylgt því eftir að allir eligubílstjórar sem starfi á flugvellinum geri það í samræmi við þá skilmála sem þeir gangist undir við félagið. Verði bílstjórar uppvísir um að brjóta gegn þeim geri Isavia athugasemdir og loki fyrir aðgang þeirra að svæðinu ef þeir bregiðist ekki við athugasemdum. Alvarleg brot sem tilgreind eru í skilmálum séu kærð til lögreglu.

„Þeim tilvikum þar sem við höfum þurft að loka fyrir aðgang hefur, sem betur fer, fækkað. Á síðustu sex mánuðum höfum við aðeins þurft að loka á aðgang sex bílstjóra að meðaltali á mánuði en 12 mánuðina þar á undan voru þeir um 13 á mánuði að meðaltali,“ segir í svarinu.

„Þegar upp koma alvarlegri mál á borð við líkamleg áttök eða grun um sviksamlega viðskiptahætti þá ættu slík mál að fara beint og milliliðalaust til lögreglu eða eftir atvikum Samgöngustofu, sem hefur eftirlit með bílstjórum og veitir þeim starfsleyfi.“