Færri störf þótt stefnan sé að fjölga störfum

Stjórnsýsla Opinberum störfum á Vesturlandi hefur fækkað um nærri 23 stöðugildi á síðustu tveimur árum þrátt fyrir þá stefnu stjórnvalda að fjölga störfum í landsbyggðunum. Haraldur Benediktsson, þingmaður Sjálfstæðisflokksins, segir ekki hafa gengið nógu vel að flytja verkefni út á land og margar stofnanir vítt og breitt um landið geti auðveldlega tekið við fleiri verkefnum og aukið við sig mannskap. Vífill Karlsson, forstöðumaður Samtaka sveitarfélaga á Vesturlandi, hefur tekið saman hagvísi fyrir Vesturland. Í skýrslunni kemur fram að þrátt fyrir fjölgun opinberra stofnana á Vesturlandi hefur störfum þar fækkað á einungis tveimur árum. Störfum fækkaði mest á vegum mennta- og menningarmálaráðuneytis eða um rúmlega 46 stöðugildi sem helst verður rakið til þriggja framhaldsskóla og Landbúnaðar­háskólans á Hvanneyri. „Okkur hefur ekki gengið nægilega vel að flytja verkefni út á land. Að mínu mati ættum við að setja okkur skýr markmið um að 5-10 prósent starfa hins opinbera verði skilgreind án staðsetningar. Þar er hægt að nýta starfsmannaveltu til að fjölga störfum án staðsetningar,“ segir Haraldur. „Við erum ekki aðeins að sjá þetta á Vesturlandi heldur vítt og breitt um landið. Ég geri mér hins vegar miklar vonir um að við náum að fjölga störfum, jafnt opinberum sem og í einkageiranum á næstu árum og munum vinna að því verkefni. Við eigum að búa til sem fjölbreyttust störf alls staðar á landinu.“ Einnig kemur fram í hagvísi Vífils Karlssonar að af þeim 10 krónum sem ríkissjóður fær í tekjur af Vesturlandi fara aðeins sjö krónur til baka á svæðið. Því sé að mati Vífils ákveðin slagsíða í „ríkisfjárjöfnuði“ svæðisins eins og hann orðar það. „Þetta er grafalvarlegt ástand og óviðunandi að þetta sé að gerast þegar menn halda stöðugt áfram að tala um fjölgun starfa á landsbyggðinni,“ segir Lilja Rafney Magnúsdóttir, þingkona VG. „Síðan gerist þetta hægt og hljótt á bak við tjöldin. Við þurfum að taka þetta alvarlega og stjórnarmeirihlutinn verður að skoða tillögur sínar við fjárlagagerð með þessar staðreyndir til hliðsjónar.“ sveinn@frettabladid.is