Serbar með lygilega skotnýtingu gegn Íslandi

Sem kunnugt er vann Serbía 29 stiga sigur, 93-64, á Íslandi á Evrópumótinu í Berlín í dag.

Íslensku strákarnir, sem töpuðu naumlega fyrir Þýskalandi og Ítalíu í fyrstu tveimur leikjum sínum á EM, héngu lengi vel í serbneska liðinu en leiðir skildu í 3. leikhluta sem Serbar unnu 25-16.

Serbarnir sýndu á löngum köflum hversu megnugir þeir eru og hvers vegna margir spá þeim sigri á EM.

Lærisveinar Aleksandar Dordevic voru mjög skilvirkir í sóknarleiknum í dag en skotnýting þeirra inni í teig var lygileg, eða 79%. Á meðan settu íslensku strákarnir aðeins niður 38% skota sinna inni í teig.

Serbar skoruðu úr 26 af 33 skotum sínum inni í teig en enginn leikmanna þeirra var með með undir 50% skotnýtingu í leiknum. Þriggja stiga nýtingin var heldur ekkert slot en serbnesku leikmennirnir settu niður átta þrista í 20 tilraunum, sem gerir 40% skotnýtingu.

Þá gáfu Serbarnir 32 stoðsendingar í leiknum en ekkert lið hefur gefið jafn margar stoðsendingar í einum leik á mótinu til þessa.

Dordevic náði líka að dreifa álaginu vel í dag en allir 12 leikmennirnir á skýrslu fengu að spila og allir komust þeir á blað.

Nemanja Nedovic var stigahæstur í liði Serbíu með 15 stig en næstur kom miðherjinn tröllvaxni Miroslav Raduljica með 13 stig.

Bakverðirnir Milos Teodosic og Bogdan Bogdanovic gáfu flestar stoðsendingar í liði Serba, eða sex hvor.

Serbía mætir Tyrklandi og Ítalíu í tveimur síðustu leikjum sínum í B-riðli.