Síbrotamaður í tveggja mánaða fangelsi fyrir bensínþjófnað

Héraðsdómur Reykjaness hefur dæmt karlmann til tveggja mánaða fangelsisvistar fyrir að hafa stolið eldsneyti fyrir tæpar 60 þúsund krónur af Olíuverslun Íslands hf. Maðurinn dældi fimm sinnum á bílinn sinn á tímabilinu 21. apríl til 5. maí á bensínstöðvum Olíuverslunarinnar og ók á brott án þess að borga.

11. febrúar síðastliðinn var maðurinn dæmdur í tíu mánaða fangelsi fyrir eitt þjófnaðarbrot og brot gegn umferðarlögum, nánar tiltekið að hafa ekið bifreið sviptur ökurétti alls fimm sinnum á tímabilinu 22. maí til 17. júlí 2014 og að auki í eitt skipti undir áhrifum ávana- og fíkniefna.

Manninum var í ljósi sakaferils gerð fangelsisrefsing fyrir sviptingarakstur með dómi 10. janúar 2014, en á sakavottorði hans kemur fram að hann hafi gengist undir sektargreiðslur með sáttum hjá lögreglustjóra 19. september 2012 og hlotið dóm 15. júní sama ár fyrir slík brot, en dómurinn, sem hljóðaði upp á fjögurra mánaða fangelsi, tók að auki til annarra umferðarlagabrota og þjófnaðarbrots.

Þá var maðurinn dæmdur í 30 daga fangelsi 29. mars 2011 fyrir þjófnað og með dómi 15. júní 2010 var hann sakfelldur fyrir umferðarlagabrot, eignaspjöll, skjalafals og þjófnað og gert að sæta fangelsi í átta mánuði.

Brot mannsins, sem hann var dæmdur fyrir í Héraðsdómi Reykjaness í dag, voru framin áður en framangreindur dómur frá 11. febrúar síðastliðinn var kveðinn upp. Var því litið til fyrri brota þegar refsing hans var kveðinn upp en honum er gert að sæta fangelsisvist í tvo mánuði.

Maðurinn játaði bensínþjófnaðinn skýlaust fyrir dómi og var dæmdur til að endurgreiða Olíuverslun Íslands 57.288 krónur.