Ógrynni af efni frá Mammút í þjófshöndum

„Þetta er gífurlegt tjón,“ segir Alexandra Baldursdóttir, gítarleikari Mammút.

Hún lenti í því í vikunni að óprúttnir aðilar brutust inn á heimili hennar og kærasta hennar, umturnuðu þar öllu og höfðu með sér nýleg og dýr raftæki. Auk þess voru hafðir á brott harðir diskar með ógrynni af efni frá parinu sem starfa bæði sem grafískir hönnuðir og einn harðan disk sem geymdi efni frá Mammút.

„Þetta hljómaði eins og þetta hefði verið skipulagt,“ segir Alexandra en hún er úti á landi að selja fyrir nýja plötu. Kærastinn hennar hringdi í hana þegar hann kom heim. „Það var allt á hvolfi heima. Hann skildi ekkert hvað hafði gengið á.“ Þegar hann tók að gá að raftækjunum var allt horfið. „Öll raftæki, allir harðir diskar líka og meira að segja umbúðir af gömlum raftækjum sem ég var með í kassa. Allt rifið upp.“ Þjófarnir höfðu tæmt gamlar töskur sem voru í íbúðinni, sett varninginn í þær og haldið á brott.

Sárt að missa gögnin

Alexandra lýsir eftir tækjunum á Facebook en um nokkuð langan lista er að ræða. Hún segist alls ekki hafa gefið upp vonina um að finna tækin og trúir á mátt fjöldans. Því biður hún fólk sem hefur upplýsingar að hafa samband við lögreglu eða sig á Facebook og aðra að deila fréttinni áfram. „Það má einnig koma fram að fundarlaun eru í boði,“ segir Alexandra staðráðin í að endurheimta gögnin sín.

Tækin sem um ræðir eru tvær Mac book pro tölvur, önnur 13 tommu og hin 15 tommu, Intuos pro teikniborð, Canon legria myndavél, Canon eos myndavél, Apogee duet upptökutæki og tvenn Sennheiser HD 25 pro heyrnartól. Auk þessa fyrrnefndir harðir diskar sem Alexandra saknar mest, hún skilur í raun ekki markmiðið með að ræna þeim, gamlir harðir diskar eru nokkurra þúsund kalla virði.

„Það er mjög sárt að missa mörg terabæt af tónlist, ljósmyndum og svo erum við bæði grafískir hönnuðir þannig að þarna er mikil vinna. En það eru engin verðmæti í þessum gögnum nema fyrir okkur.“ 

Óþægilegt að ókunnugur þjófur vasist í persónulegum gögnum

Harði diskurinn sem geymdi efni frá Mammút hefur gengið á milli hljómsveitarmeðlima lengi. „Þar vorum við með nýtt tónlistarmyndband, nokkur demó myndbönd og lög. Efni langt aftur í tímann.“

Alexandra segist ekki enn vera búin að átta sig á að innbrotið hafi raunverulega átt sér stað. „Þetta er eins og að vakna upp af martröð. Þetta er svona eitt af því sem manni dettur ekki í hug að geti gerst, eða allavega ekki á svona grófan hátt. Maður treystir náunganum.“

Hún segir það óþægilega tilhugsun að manneskja sem hún ekki þekki hafi hennar persónulegu gögn. „Maður veit ekkert hverjir þetta eru sem eru með allt dótið manns. Hverjir það eru sem eru að fara í gegnum allt, róta í öllu.“

Málið er komið til lögreglu og er til rannsóknar.

Ég vil biðja ykkur elsku vinir, tónlistarmenn, hönnuðir og allir þeir sem geta ímyndað sér hversu ömurlegt það er að...

Posted by Alexandra Baldursdóttir on Wednesday, July 29, 2015

Kæru vinir. Í gær þegar ég lagði af stað útúr bænum og Gabríel var í vinnunni var brotist inn til okkar. Tvær mac book...

Posted by Alexandra Baldursdóttir on Wednesday, July 29, 2015