Svona var atburðarrásin þegar strokufangarnir voru handteknir

Lögreglan á Selfossi handtók mennina tvo sem flúðu af Kvíabryggju í gærkvöldi um hádegisbil í dag. Mennirnir fundust á Þingvöllum en það var tilkynning vegfaranda sem leiddi til þess að þeir fundust. Oddur Árnason, yfirlögregluþjónn á Suðurlandi, lýsti atburðarrásinni í Reykjavík síðdegis á Bylgjunni í dag.

• Tilkynning barst frá vegfaranda sem hafði króað af mann í annarlegu ástandi við Þingvallavatn um klukkan hálf eitt.
• Lögregla var snör í snúninum og náði mönnunum við Valhallarstíg.
• Tvímenningarnir voru fluttir í fangaklefa á Selfossi og færðir í beinu framhaldi af því á Litla-Hraun.
• Mennirnir höfðu brotist inn í að minnsta kosti einn sumarbústað og á þeim fundust ýmsir munir sem lögregla hefur nú lagt hald á.

Oddur segir það ekki liggja fyrir hvernig mennirnir komu sér á Þingvelli. Hvort einhver hafi verið með í ráðum sé óljóst en það sé í rannsókn. Aðspurður hvort þeir hafi sýnt mótspyrnu við handtökuna sagði hann svo ekki vera. Þvert á móti því þeir hafi verið afar prúðir.

„Það er náttúrulega vont að láta ná sér svona. Þegar menn eru komnir í sinni afplánun á Kvíabryggju þá er svona talið almennt að þeir séu komnir á beinni braut og þetta er stórt fall fyrir unga menn að vera komnir aftur í þessa stöðu, inn á lokaðri vistun.“

Upp komst um flótta mannanna seint í gærkvöld þegar þeir skiluðu sér ekki í klefa sína á tilsettum tíma. Lögreglu var gert viðvart en engin formleg leit var sett af stað.

Páll Winkel fangelsismálastjóri segir málið litið alvarlegum augum. Verst sé þetta þó fyrir piltana sjálfa því þeir hafi haft mikilla hagsmuna að gæta. Nú verði þeir færðir í eingangrun og þurfi að ljúka afplánun á Litla-Hrauni.

Viðtalið við Odd og Pál má heyra í spilaranum hér fyrir ofan.