Aron ónotaður varamaður í sigri Bandaríkjanna

Aron Jóhannsson kom ekkert við sögu þegar Bandaríkin unnu 2-1 sigur á Hondúras í fyrsta leik sínum í Gullbikarnum, álfukeppni Norður- og Mið-Ameríku.

Clint Dempsey skoraði bæði mörk Bandaríkjanna sem þóttu ekki sannfærandi þrátt fyrir sigurinn.

Dempsey kom bandaríska liðinu yfir á 26. mínútu og eftir rúmlega klukkutíma leik skoraði hann sitt annað mark. Carlos Israel Discua minnkaði muninn í 2-1 á 70. mínútu en nær komst Hondúras ekki.

Í nótt gerðu Panama og Haítí 1-1 jafntefli í sama riðli.

Næsti leikur Bandaríkjanna er gegn Haítí á laugardaginn.