Van Gaal: United síðasta liðið sem ég þjálfa

Louis van Gaal segir að hann ætli að setjast í helgan stein þegar að hann lýkur störfum hjá Manchester United, þar sem hann er knattspyrnustjóri.

Van Gaal tók við United í sumar og er samningsbundinn félaginu til 2017. Hann er 63 ára gamall og vill verja meiri tíma með fjölskyldu sinni.

Hann hefur á ferlinum stýrt mörgum af stærstu félagsliðum Evrópu, svo sem Barcelona, Bayern München og Ajax.

„Ég er gamall. Þetta verður mitt síðasta starf, það er víst. Ég verð að veita börnum mínum og barnabörnum meiri athygli - en líka eiginkonu minni. Þau eiga það skilið,“ sagði hann.

„Ég hef ekki tækifæri til þess núna. Ég missti til dæmis af afmæli barnabarnsins míns. Ég var ekki hrifinn af því.“

Hann segir að hann muni flytja til Portúgals með eiginkonu sinni þegar hann hættir að vinna. „Þar ætla ég að spila golf og borða frábæran mat.“