„Sérkennilegt“ að kippa teppinu undan sérstökum á síðustu metrunum

Skýrslugerðir eru leiðarahöfundi Morgunblaðsins hugleiknar í dag en þar ber hann saman skýrslugerðir í Bretlandi og á Íslandi eftir að hafa lesið skrif Dominics Lawson, dálkahöfundar Sunday Times, um rannsóknarnefndir og árangur þeirra. Beinir leiðarahöfundur Morgunblaðsins því sjónum sínum að skelfilegum fréttum sem hafa borist frá Bretlandseyjum af ofbeldi gegn börnum þar í landi sem voru undir forsjá yfirvalda.

„Sögur um níðingsverk inni á slíkum stofnunum eru því miður þekktar. Einnig hér á landi,“ skrifar leiðarahöfundurinn sem segir að frá Bretlandi hafi þó þær fréttir bæst við að mönnum, óviðkomandi þessum stofnunum, hafi verið „veittur aðgangur“ að börnum. „Við það bætist að öruggt er talið að ýmsir valda- og áhrifamenn hafi verið í þeim hópi,“ skrifar leiðarahöfundurinn.

Erfitt að finna rannsakanda

Það hefur þó gengið erfiðlega að finna rannsakanda sem sátt ríkir um og þá hefur verið gagnrýnt að skýrslan eigi einungis að ná aftur til ársins 1970. Þá nefnir leiðarahöfundur rannsókn á árásinni sem var kölluð „Hinn blóðugi sunnudagur“, þegar skothríð var hafin á mótmælendur í Londonberry. Rannsóknin stóð yfir í 12 ár og kostaði fjörutíu milljarða og talið ljóst að fá fórnarlambanna muni lifa til að sjá skýrsluna sem nú er verið að reyna að hleypa af stokkunum.

Leiðarahöfundur ber því næst þessar skýrslugerðir í Bretlandi saman við skýrslugerðir á Íslandi. „Okkar skýrslur, eftir að skýrslufár hófst hér á landi, kostuðu bara fáeina milljarða. Og þær voru birtar, svona að mestu. Og þótt þær lökustu væru hneyksli þá var töluverður fróðleikur falinn í sumum þeirra, þótt skort hafi á fagmennsku og hlutlægni,“ skrifar leiðarahöfundur Morgunblaðsins.

Hann segir Lawson telja að meira vit væri í því að treysta lögregluyfirvöldum fyrir svona rannsóknum, þar sem lagarammi þeirra væri ljós og öllum kunnur. „Líkur á árangri væru mun raunhæfari, þótt þau fengju aðeins hluta af þeim fjármunum sem sóað væri í skýrslurnar,“ skrifar leiðarhöfundur og víkur máli sínu aftur heim á Ísland.

Milljarðar í „gölluðu“ skýrslurnar

„Það er sérkennilegt mjög að eftir að hafa kastað milljörðum í gölluðu skýrslurnar skuli ákveðið að kippa teppinu undan Sérstökum saksóknara og ákæruvaldinu á síðustu metrunum í þeirra vinnu,“ skrifar leiðarahöfundur og lýkur skrifum sínum með þessum orðum:

„Kannski verður einhvern tíma skrifuð margorð „rannsóknarskýrsla“ um það hvers vegna í ósköpunum það var gert.“