Sérstakur gefur ekki skýrslu um hleranir

Hæstiréttur sneri í dag við úrskurði Héraðsdóms Reykjavíkur þess efnis að sérstakur saksóknari, Ólafur Þór Hauksson, og fimm aðrir starfsmenn embættisins gæfu skýrslu vegna hlerana í tengslum við Al Thani-málið.

Á meðal þeirra sem gefa áttu skýrslu var Jón Óttar Ólafsson, fyrrverandi starfsmaður sérstaks saksóknara, sem mjög hefur gagnrýnt starfsaðferðir embættisins.

Hörður Felix Harðarson, verjandi Hreiðars Más Sigurðssonar, fyrrum forstjóra Kaupþings, fór fram á sexmenningarnir gæfu skýrslu varðandi það sem hann taldi ólöglegar hleranir á símtölum Hreiðars við verjanda sinn.

Í dómi Hæstaréttar kemur fram að upptökurnar af símtölum Hreiðars við Hörð myndu ekki koma til neinna álita varðandi dóm Hæstaréttar í Al Thani-málinu en Hreiðar var dæmdur í fimm og hálfs árs fangelsi fyrir aðild sína að því. Dómnum var áfrýjað og vildi verjandi Hreiðars kalla vitnin til áður en Hæstiréttur myndi kveða upp dóm sinn.

Þá staðfesti Hæstiréttur dóm héraðsdóms um að ekki væri þörf á að kalla tvo rannsakendur til viðbótar til að gefa skýrslu, varðandi breytta réttarstöðu sem Halldór Bjarkar Lúðvíksson, fyrrverandi starfsmaður Kaupþings í Lúxemborg, fékk á meðan á rannsókn Al Thani-málsins stóð.

Þá staðfesti Hæstiréttur úrskurð héraðsdóms þess efnis að verjandi Ólafs Ólafssonar fái heldur ekki að kalla til nýtt vitni í málinu, en Ólafur hlaut þriggja og hálfs árs fangelsi í héraði fyrir Al Thani-málið. Hann áfrýjaði þeim dómi til Hæstaréttar.