Vegakaflinn Eiði-Þverá opnaður á Vestfjörðum í dag

Sextán kílómetra nýr vegakafli sem liggur frá Eiði í Vattarfirði og Þverár í Kjálkafirði á sunnanverðum Vestfjörðum verður formlega opnaður síðar í dag.

Ólöf Nordal innanríkisráðherra mun klippa á borða með aðstoð Hreins Haraldssonar vegamálastjóra og fer athöfnin fram við áningarstað sem er rétt austan brúarinnar yfir Mjóafjörð.

Í tilkynningu frá Vegagerðinni segir að Vestfjarðavegur (60) sé aðalsamgönguæð sunnanverðra Vestfjarða. „Hinn nýi vegur sem nú er formlega tekinn í notkun liggur frá Eiði í Vattarfirði að Þverá í Kjálkafirði. Nýi vegurinn er 16 km langur og leysir af hólmi 24 km langan malarveg og styttir því leiðina um 8 km. Vegurinn þverar Mjóafjörð og Kjálkafjörð. Kostnaður var í upphafi áætlaður 3,6 milljarðar króna og stefnir í að lokakostnaður verði 3,7-3,8 milljarðar á sambærilegu verðlagi.

Þetta er einn af stóráföngunum í bættum samgöngum á svæðinu en önnur helstu verk sem unnin hafa verið á síðustu árum eru Brattabrekka (2003), vegur um Svínadal (2007), þverun Gilsfjarðar (1999), vegur um Klettsháls (2004), vegur úr Kjálkafirði í Vatnsfjörð (2010) og um Kleifaheiði (2002). Að þessum áfanga loknum er aðeins einn stór áfangi eftir á sunnanverðum Vestfjörðum, kaflinn í Gufudalssveit þar sem ágreiningur hefur verið um vegagerð um Teigsskóg,“ segir í tilkynningunni.

Vegurinn er byggður í vegflokki C8, með heildarbreidd 8,0 metra en þar af er slitlag 7,0 metra breitt. Tvær brýr voru byggðar vegna þverana fjarðanna. Brúin á Mjóafirði er 160 metra löng og brúin á Kjálkafirði er 117 metra. Í veginn fóru um 1.600 þ.m3 af efni og í brýrnar fóru um 2.900 m3 af steypu og um 215 tonn af stáli.