Detta úr háum rúmum foreldra

Komið er með rúmlega tvö þúsund börn á ári bráðamóttöku Landspítalans með höfuðáverka. Yfirlæknir segir slysum þar sem börn detta úr rúmum foreldra sinna hafa fjölgað með aukningu amerískra rúma á heimilum.

Nýleg rannsókn sýnir að á átta ára tímabili komu rúmlega þrjátíu og fimm þúsund Íslendingar á Landspítalann með höfuðáverka. Stærsti hópurinn var börn fjögurra ára og yngri eða um fimmtungur. Brynjólfur Mogensen, yfirlæknir á bráðamóttöku LSH, er einn þeirra sem gerði rannsóknina. Hann segir mikinn árangur hafa náðst á síðustu þrjátíu árum í að draga úr slysum og höfuðáverkum barna. Íslendingar eigi þó enn nokkuð í land með að ná þeim sem standa sig hvað best.

Þá hafi læknar einkum áhyggjur af því að komið er með börn í auknu mæli á sjúkrahús eftir að þau slasast í svefnherbergjum foreldra sinna. „ Það er mjög áberandi að yngstu börnin eru svolítið að detta úr háum rúmum. Amerískum rúmum sem eru kannski áttatíu nítíu sentimetrar á hæð. Þau detta þaðan niður af því það litið er af þeim eitt augnablik. Rúmin voru ekki þannig. Það er svona breyting í heildarmunstrinu,“ segir Brynjólfur.