"Staða okkar er ömurleg“

Þungt hljóð er í framhaldskólakennurum eftir samstöðufundi sem haldnir voru um land allt í morgun. Kennararnir segja slæm starfskjör ógna nýliðun í stéttinni og grafa undan skólastarfi.  Ákvörðun um hvort ráðist verður í verkfall verður tekin á næstu dögum.

Framhaldsskólakennarar lögðu niður störf klukkan fimm mínútur ellefu í dag og funduðu í um klukkutíma.

„Það er mikill hugur í fólki. Nú eru liðin of mörg ár í endalausum niðurskurði og staða okkar er ömurleg. Ef að ekkert býðst verðum við að fara í hart, við munum ekki frá hverfa,“ sagði Halldóra Sigurðardóttir, kennarí í MH, að fundi loknum.

Kennarar í framhaldsskólum víða um land hafa sent frá sér ályktanir sem samþykktar voru á samstöðufundum. Þær hafa streymt inn á vefsíðu Kennarasambands Íslands í dag, en þar er lýst yfir þungum áhyggjum af stöðu mála og vonbrigðum yfir tilboði samninganefndar ríkisins.

Framhaldskólakennarar telja sig hafa dregist aftur úr sambærilegum stéttum hjá hinu opinbera undanfarin ár, en meðaltal dagvinnulauna þeirra er í dag rúmlega 395 þúsund krónur á mánuði. Kennararnir vilja að þeim verði bætt kjararýrnum sem þeir telja sig hafa orðið fyrir umfram viðmiðunarstéttir, en þá myndu laun þeirra hækka um 17% og verða rúmar 463 þúsund krónur á mánuði.

Formaður Félags framhaldsskólakennara segir að staðan verði metin á næstu dögum og þá tekin ákvörðun um hvort boðað verði til aðgerða á borð við verkfall.