Píratar mæla ekki með rafrænum þingkosningum

Það er ekki stefna Pírata að teknar verði upp rafrænar kosningar í stærri atkvæðagreiðslum svo sem sveitarstjórnarkosningum og alþingiskosningum.

„Það er ástæða fyrir því að við Píratar höfum ekki verið að kalla eftir því að internetið sé notað til að kjósa til Alþingis eða í þjóðaratkvæðagreiðslu. Grundvallargallinn við kosningar um alvarleg málefni á internetinu er sá að það er ekki hægt að tryggja það að kjósandinn sé einsamall við tölvuna,“ segir Helgi Hrafn Gunnarsson, þingmaður Pírata. Þar með tekur hann undir varnaðarorð Hauks Arnþórssonar, doktors í rafrænni stjórnsýslu, sem gagnrýndi rafrænar kosningar í Fréttablaðinu í gær.

„Þegar það eru til dæmis alþingiskosningar eða kosningar um kvótakerfið þá er óhugsandi að ætlast til þess af fólki að það standist þann félagslega þrýsting sem óhjákvæmilega myndast,“ segir Helgi Hrafn.

Helgi segir að rafrænar kosningar geti þó nýst til minniháttar ákvarðana.

„Ég tel ekki að rafrænar kosningar geti tekið við af hefðbundnum kosningum í bili. Að því sögðu geta þær hentað fyrir ýmsa hluti, innra málefnastarf, prófkjör eða ákvarðanir sem varða ekki mikla hagsmuni.“

Helgi segir að ekkert kerfi sé fullkomlega öruggt. „Mælikvarðinn er hversu mikinn tíma og hversu mikla peninga kostar að brjóta þau. En sú regla á ekki bara við um hugbúnað. Það er ekki til það kosningakerfi sem ekki er hægt að svindla á með einhverjum hætti.“

Undir þetta tekur Smári McCarthy, starfandi sérfræðingur í upplýsingaöryggi.

„Helsta vandamálið er að það er ekki til neitt kosningakerfi í dag sem er bæði sannreynanlegt og ekki er hægt að tengja við kjósandann. Pappírskosningar eru ótengjanlegar að jafnaði, en kjósandinn getur ekki verið öruggur með að atkvæðið hafi skilað sér rétt því leyndin er mikil. Við gerum okkur upp sannreynanleika með því að setja nógu mikið af nógu ólíku fólki inn í ferlið og vona að það komist upp um allt svindl.“



73% landsmanna fylgjandi rafrænum kosningum

Í áður óbirtri könnun MMR fyrir Auðkenni kemur fram að 73 prósent telja mikinn eða mjög mikinn ávinning fylgja því að geta kosið á netinu. Könnunin var gerð í lok árs 2012.

Mestur stuðningur við rafrænar kosningar var í aldurshópnum 50 til 54 ára, eða 80 prósent. Minnstur er stuðningurinn í aldurshópnum 18 til 19 ára, 59,3 prósent.

Horft til rafrænna kosninga í Eistlandi

Á Íslandi hafa stjórnvöld litið til reynslu Eistlands af rafrænum kosningum sem nær aftur til ársins 2005.

Ný skýrsla fræðimanna við Háskólann í Michigan gagnrýnir framkvæmdina og segir meðal annars: „Það eru margar leiðir fyrir hið opinbera, góða hakkara eða óheiðarlega aðila sem starfa við kerfið til að fella eistneska kosningakerfið. Slík árás gæti breytt atkvæðum og haft áhrif á niðurstöðu kosninga.“