Vilja skoða niðurgreiðslu nikótínlyfja

Tíðni daglegra reykinga er þrefalt hærri á meðal þeirra sem eru með grunnskólapróf en þeirra sem eru með háskólapróf. Sams konar munur er eftir tekjum. Þó nokkur munur er á tíðni reykinga milli landshluta. Þetta er meðal niðurstaðna rannsóknarinnar Heilsa og líðan Íslendinga 2012.

Í ljósi þessara niðurstaðna er ástæða til að skoða breytingar á áherslum í framkvæmd tóbaksvarna, að sögn Viðars Jenssonar, verkefnisstjóra tóbaksvarna hjá Landlæknisembættinu. „Í Danmörku hefur til dæmis eitt sveitarfélag boðið þeim sem eru með minni menntun, lægri tekjur, atvinnulausum og öðrum ákveðnum hópum sérstök úrræði eins og einstaklingsmiðaða meðferð og niðurgreiðslu á nikótínlyfjum. Þessar tilraunir hafa gefist vel upp á síðkastið. Stofnaður hefur verið sjóður til þess að gefa fleiri sveitarfélögum tækifæri til að fara sömu leið. Við höldum að það sé komið að því að fara í sértækari úrræði hér á landi en við höfum gert áður,“ segir Viðar.

Hann getur þess að menntun og helstu atvinnugreinar geti verið möguleg skýring á muninum á tíðni reykinga milli landshluta. Á grundvelli greininga á breytum megi mögulega byggja staðbundnar aðgerðir í sveitarfélögum landsins. Tíðni daglegra reykinga er hæst á Suðurnesjum hjá báðum kynjum.

Tíðnin lækkar hins vegar í öllum heilbrigðisumdæmum milli 2007 og 2012 sem Viðar segir ánægjulegar niðurstöður. „Sá hópur sem hefur aldrei reykt er nú fjölmennari en sá sem hefur einhvern tíma reykt eða reykir enn. Nú reykja um 12 prósent Íslendinga daglega. Stöðug lækkun daglegra reykinga hjá ungu fólki er jafnframt mikið ánægjuefni. Þessir tveir þættir gefa manni von um varanlegan árangur.“

Frá 2000 til 2013 lækkaði tíðni daglegra reykinga á meðal framhaldsskólanema úr 21 prósenti í 7,6 prósent.