„Þú ert víst að fara til Kaupmannahafnar!“

Rúna Lís Emilsdóttir lenti ásamt syni sínum í heldur bagalegu klandri nú fyrir skömmu í flugstöð Leifs Eiríkssonar.

Rúna og Einar sonur hennar voru á leið til Doha í Katar þar sem maður hennar, Einar Már, starfar við eldvarnir og áttu þau bókað flug með Icelandair í gegnum París þangað sem þau ætluðu að ná tengiflugi áfram til Austurlanda nær.

Við innritunarborðið kom þó babb í bátinn.

„Þegar Rúna er að tjekka sig inn spyr hún afgreiðslukonuna hvort hún gæti ekki bókað töskurnar sínar alla leið til að spara sér tíma þegar til Parísar væri komið. Þá er henni sagt að það sé ekki hægt, slíkt er ómögulegt þegar flogið er um Kaupmannahöfn,“ segir Einar Már maður hennar í samtali við Vísi.



Rak Rúnu þá í rogastans enda áttaði sig hún ekki á því hvað það kæmi málinu við, hún ætti bókað flug um París rétt eins og flugmiði hennar greindi til um. „En ég er ekki á leið til Kaupmannahafnar, sagði hún þá. „Þú ert víst að fara til Kaupmannahafnar,“ voru viðbrögð afgreiðslukonunnar og hófust þá mikil orðaskipti þeirra á milli,“ bætir Einar við.

Þegar hiti var farinn að færast í leikana þurfti að kalla til yfirmann sem klóraði sér í kollinum og átti engin svör við því hvers vegna bókunarkerfi Icelandair sagði að hún skyldi fljúga um Danaveldi, sérstaklega í ljósi þess að útprentaður miði hennar tilgreindi annað.

Allt hafi þó gengið að lokum. Rúna og Einar sonur hennar flugu í gegnum París til Doha þrátt fyrir allt havaríið við innritunarborðið.

„Hún hefði neyðst til að fljúga í gegnum Kaupmannahöfn og misst af tengifluginu ef ekki hefði verið fyrir ákveðni hennar.  Litlu mátti muna að hún hefði brotnað niður.“ Var henni gert að greiða rúmar 80 þúsund krónur fyrir tvær auka töskur sem hún hugðist taka með sér til Katar. Einar grunar að um dulið breytingargjaldi hafi verið að ræða þó svo að ómögulegt sé að slá því föstu.

Til að bæta gráu ofan á svart í bókunarævintýri Rúnu þá rataði ein taskan ekki til Parísar. Hún hafði endað í Kaupmannahöfn. Eftir töluvert stapp hafi þó tekist að koma henni alla leið til Doha.

Í samtali við Vísi segjast starfsmenn Icelandir hvorki skilja upp né niður í þessum mistökum enda eigi svo sannarlega ekki að vera hægt að vera bókaður í tvö flug í einu. Málið sé nú til skoðunar hjá fyrirtækinu og að leitað sé dyrum og dyngjum að lausninni á þessu bagalega vandamáli.

Grunur liggur á að mistökin liggi  í kerfi fyrirtækins sem Rúna pantaði miðann hjá en sem fyrr segir er nákvæm orsök ókunn.