Telja að ríkisendurskoðandi hefði átt að víkja vegna fjölskyldutengsla

Stjórnskipunar- og eftirlitsnefnd telur að Sveinn Arason, ríkisendurskoðandi, hefði átt að víkja vegna fjölskyldutengsla þegar stofnun hans vann að skýrslu um fjárhagskerfi ríkisins. Þá telur nefndin að kostnaður við verkefnið hafi verið mun meiri en áætlanir gerðu ráð fyrir og upplýst var fyrir Alþingi og telur nefndin það mjög gagnrýnisvert. Nefndin skilaði áliti sínu í gær.

Nefndin bendir á að annar bróðir Sveins var skrifstofustjóri í fjármálaráðuneyti sem sat í stýrinefnd um kaup á kerfinu og hinn var framkvæmdastjóri hugbúnaðarlausna hjá Skýrr hf. sem seldi ríkinu kerfið og var síðar ritari þeirrar stýrinefndar sem sá um innleiðingu á kerfinu hjá Fjársýslunni. Því sé aðkoma Sveins á málinu til þess fallin að rýra trúverðugleika hans sem trúnaðarmanns þingsins.

Kerfið var keypt af Skýrr árið 2001 og hljóðaði samningurinn upp á rúman milljarð. Árið 2009 þegar drög að skýrslu Ríkisendurskoðunar um málið unnin, var kostnaðurinn kominn í rúma fjóra milljarða.

Forseti Alþingis óskaði eftir því í apríl 2004 að Ríkisendurskoðun gerði úttekt á því hvernig staðið var að undirbúning og framkvæmd við að koma á nýju hugbúnaðarkerfinu Orra (ORACLE) hjá ríkinu, bæði fjárhagslega og faglega. Ríkisendurskoðun varð við beiðninni en sá dráttur sem varð á að ljúka úttektinni og ganga frá skýrslu til  Alþingis varð tilefni ítarlegrar fjölmiðlaumfjöllunar í september og október 2012, rúmum átta árum frá beiðni forseta Alþingis.

Málið olli miklu fjaðrafoki á Alþingi eftir umfjöllun Kastljóss á sínum tíma. Þá hefur Ríkisendurskoðun verið töluvert gagnrýnd fyrir seinagang við vinnu skýrslunnar.