Vilja vita hvort Alþingi var gert viðvart um tafir á Oracle-málinu

Stjórnskipunar- og eftirlitsnefnd ætlar að senda Sveini Arasyni, ríkisendurskoðanda bréf, síðar í dag vegna Oracle málsins svokallaða. Málið snýst um launa- og bókhaldskerfi ríkisins, en kostnaður við innleiðingu þess fór algjörlega úr böndunum. Skýrsla sem Ríkisendurskoðun var falið að vinna um verkefnið hefur verið fjölda ára í vinnslu.

Valgerður Bjarnadóttir, formaður stjórnskipunar- og eftirlitsnefndar, sendir bréfið fyrir hönd nefndarinnar. Í samtali við Vísi segir hún að spurt sé út í verklag Ríkisendurskoðunar, hvort unnin sé starfsáætlun um verk sem ekki eru reglubundin, til hversu langs tíma slík áætlun sé gerð og hvort hún sé endurskoðuð. Þá er spurt hvort skýrslan um Oracle-kerfið sé á slíkri áætlun.

„Við spyrjum líka hvort Alþingi hafi verið gert viðvart þegar ákveðið var að fresta verkinu. Og ef það var ekki gert, af hverju ekki," segir Valgerður Bjarnadóttir, í samtali við Vísi. Þá er líka spurt hvort Ríkisendurskoðun hafi sett viðmið um vinnslutíma úttekta. Einnig hvort Ríkisendurskoðun hafi sett viðmið um upplýsingagjöf til fjölmiðla á meðan á vinnslu verkefna stendur.

Áður hafði Ásta Ragnheiður Jóhannesdóttir, forseti Alþingis, sent Sveini bréf þar sem þess er krafist að vinna við endurskoðun Oracle-skýrslunnar verði lokið fyrir mánaðamót. Svar frá Sveini barst forsætisnefnd í gær en ekkert hefur verið látið uppi um innihald þess.