Skýrsla Ríkisendurskoðunar um Oracle komin

Umdeild skýrsla Ríkisendurskoðunar um Oracle fjárhags- og mannauðskerfi var birt á vef Ríkisendurskoðunar í dag. Í skýrslunni kemur fram að áætlanagerð vegna kaupa og innleiðingar á kerfinu hafi veirð ábótavant. Bæði hafi innleiðingartími verið vanáætlaður sem og stofnkostnaður kerfisins. Þá hafi heildarkostnaður kerfisins ekki verið metinn, eins og segir í skýrslunni.

Ríkisendurskoðun beinir því til stjórnvalda að standa framvegis betur að málum við kaup og innleiðingu hugbúnaðar. Skýrsla stofnunarinnar um málið byggir að hluta til á sömu gögnum og ófullkomin skýrsludrög frá árinu 2009 en hefur verið unnin algjörlega frá grunni á þremur vikum.

Oracle málið olli miklu fjaðrafoki á Alþingi eftir að umfjöllun um málið birtist í Kastljósi í haust. Stjórnarliðar hafa gagnrýnt Ríkisendurskoðun fyrir seinagang við vinnu skýrslunnar og hafa Björn Valur Gíslason og Valgerður Bjarnadóttir, þingmenn úr stjórnarliðinu, látið þung orð falla.