Ólafur Loftsson: „Við sitjum enn á meðan er von“

Samninganefndir grunnskólakennara og Sambands íslenskra sveitarfélaga sitja enn að fundi í Karphúsinu með ríkissáttasemjara til að reyna að finna lausn á launadeilu grunnskólakennara. Vísir náði í kvöld samtali við Ólaf Loftsson, formann félags grunnskólakennara.

„Við sitjum enn á meðan er von. Við göngum í sömu átt og erum ekki komin á leiðarenda en við erum virkilega að reyna að gera úrslitatilraun til þess að ná sátt í deilunni svo ekki þurfi að koma til verkfalls í fyrramálið,“ segir Ólafur.

Þegar hann er spurður út í það hvernig nákvæmlega samningaviðræðunum miðar segir hann ekki geta svarað því öðruvísi en að samninganefndir sitji að störfum og báðir aðilar séu að leggja sig virkilega fram við að ná lendingu í málinu. „Við munum ræða saman meðan enn er von og munum ræða saman inn í nóttina ef þess gerist þörf og við sjáum að við séum á réttri leið,“ segir Ólafur.

Boðað hefur verið til baráttufunda víða um land á morgun komi til vinnustöðvunar og formaður Félags grunnskólakennara segir að kennarar muni þá láta heyra rækilega í sér.