Makrílveiðar smábátasjómönnum mikilvægar

Framkvæmdastjóri Landsambands smábátaeigenda fagnar því að makrílkvóti til handfærabáta sé aukinn. Mikilvægt sé fyrir greinina að fá auknar aflaheimildir til að bæta upp slæma stöðu ýsustofnins. Búist er við á að annað hundrað smábátar taki þátt í makrílveiðum á þessu ári.

Sigurður Ingi Jóhannsson sjávarútvegsráðherra hefur hækkað makrílkvóta íslenskra skipa á árinu 2014 úr 148 þúsund tonnum yfir í 168 þúsund tonn. Makrílkvóti handfærabáta hækkar um 800 tonn og fer í 6.800 tonn.

Örn Pálsson, framkvæmdastjóri Landssambands smábátaeigenda, fagnar ákvörðun ráðherra. Hann segir það hafa mikla þýðingu fyrir greinina að makrílveiðarnar fari vel af stað í ljósi slæmrar stöðu ýsustofnsins. Um 80 smábátar eru á makrílveiðum um þessar mundir en búist er við því að þeir verði vel á annað hundrað þegar veiðarnar ná hámæli.