Vínyllinn kominn aftur margefldur

„Við sérhæfum okkur í útgáfu hústónlistar á vínyl,“ segir Áskell Harðarson, betur þekktur sem Housekell og einn plötusnúðanna að baki íslenska útgáfufyrirtækinu BORG LTD.

Ásamt Áskeli standa að BORG þeir Ómar Egill Ragnarsson og Jón Reginbald Ívarsson.

„Við deilum allir drífandi áhuga á hústónlist. Fyrsta útgáfan kom út um miðjan mars – en þá gáfum við út Alex Agore, þekkt nafn innan hústónlistarheimsins.“

En er ekki furðulegt að gefa út á vínyl árið 2014?

„Nei, alls ekki. Vínyllinn átti undir högg að sækja á tímabili, en eins og með alla góða hluti þá kom hann til baka og það margefldur! Þetta er miðill sem hentar plötusnúðum mjög vel, sem og söfnurum og öðrum tónlistaraðdáendum“ segir Áskell.

Nú er önnur EP-plata fyrirtækisins komin út.

„Það er Hollendingurinn FritsWentink og platan heitir Marienleben. Hún hefur þegar fengið mikla spilun hjá alþjóðlegum plötusnúðum og lög af henni hljómað á nokkrum stærstu skemmtistöðum heims,“ heldur hann áfram.

„En nú þegar platan er komin til landsins ætlum við að bjóða til sumarveislu í Lucky Records við Rauðarárstíg í dag á milli þrjú og sex,“ segir Áskell og býður alla velkomna.

„Þetta verður hústónlistarveisla og meðal annars mun vonarstjarna íslensku hústónlistarsenunnar, Viktor Birgiss, flytja frumsamda tónlist. Svo munum við allir að sjálfsögðu þeyta skífum.“