Segja gjaldtöku við Kerið lögmæta

Afstaða Kerfélagsins til gjaldtöku við Kerið er sú að hún sé fullkomlega lögmæt og heimil samkvæmt lögum. „Ekki bara það heldur ber okkur skylda til að vernda þetta land sem telst til náttúruperlna á Íslandi,“ segir Óskar Magnússon, talsmaður Kerfélagsins.

„Við höfum fært fyrir þessu lögfræðileg rök. Svo sannarlegar eru ákvæði í náttúruverndarlögum um almannarétt. Þar eru líka jafn mikilvæg ákvæði sem takmarka almannaréttinn. Það er þetta sem menn vilja svo illa skilja.“

Óskar segir engan ágreining vera um að almannréttur sé til og sé búinn að vera til frá dögum Jónsbókar. Í náttúruverndarlögunum sem nú gilda, séu þó mjög skýr ákvæði sem takmarki almannarétt.

„Það eru alveg eðlilegar ástæður fyrir því vegna þess að þó að menn vilji nú vitna í Jónsbók, þá komu ekki fimm hundruð þúsund ferðamenn með rútubifreiðum á Jónsbókartíma. Sá tími er liðinn og auðvitað tekur löggjafinn nú mið af þeim tímum sem við lifum á en ekki tímum Jónsbókar,“ segir Óskar.

„Það er alveg rétt og mjög sjálfsagt að virða allan almannarétt og það eru engir í okkar hópi sem ekki vill gera það. Í lögunum eru þó takmarkanir á honum við ákveðnar aðstæður og þær eru nú til staðar.“

Skoðun Umhverfisstofnunar reist á veikum grunni

Ennfremur segir Óskar að skoðun Umhverfisstofnunar sem sett var fram um að gjaldtaka væri ólögleg, væri ekki vel rökstudd.

„Auk þess var hún ekki borin undir okkur og okkur var ekki gefinn kostur á að njóta andmælaréttar eða neins slíks sem stjórnsýslunni þó ber að leyfa okkur að gera.“

„Ég tel að sú skoðun sé reist á afar veikum grunni. Enda kemur á daginn að stofnunin hefur ekkert gert í málinu. Ef hún hefði raunverulega lögfræðilega stöðu eins og hún er að reyna að láta liggja að, væri hún þá ekki búin að gera eitthvað.

Óskar segir að í grein eftir Stefán Þórsson, landfræðing, sem birt var í Fréttablaðinu í dag, sé því haldið fram að gjaldtakan sé yfirskyn. Að landið sé í raun ekki undir ágangi.

„Það er í fyrsta sinn sem ég sé því haldið fram. Á bökkum Kersins hafa staðið forstjóri Umhverfisstofnunar og ferðamálastjóri það hefur enginn ágreiningur verið um það á milli okkar Kersmanna og þeirra um að það þurfi svo sannarlega endurbætur við Kerið.“

Óskar segir endurbætur við Kerið þegar byrjaðar.

„Þær byrjuðu strax og það fór að koma inn aur í gjaldtökunni í fyrra. Þá byrjuðum við að bera möl og laga stíga, setja upp merkingar og bönd og framvegis. Þetta er þegar farið að sýna sig og skila sér,“ segir Óskar.