Handtekinn grunaður um njósnir fyrir bandarísk yfirvöld

Starfsmaður þýsku leyniþjónustunnar sem var handtekinn fyrir helgi grunaður um njósnir fyrir bandarísk yfirvöld er talinn hafa njósnað um yfirstandandi úttekt þýska þjóðþingsins á eftirliti Þjóðaröryggisstofnunar Bandaríkjanna á þýskum borgurum.

Handtaka mannsins er talið mesta áfall sem samskipti Bandaríkjamanna og Þjóðverja hafa orðið fyrir síðan upplýst var í október í fyrra að bandaríska þjóðaröryggisstofnunin NSA hleraði farsíma Angelu Merkel, kanslara Þýskalands, í meira en áratug eða frá árinu 2002, áður en hún varð kanslari.

Í vefútgáfu Spiegel var greint frá því að maðurinn, sem er 31 árs gamall, hafi unnið í póstdeild þýsku leyniþjónustunnar. Bild greindi frá því að maðurinn hefði stolið skjölum á tveggja ára tímabili og selt þau.

Sérstök þingnefnd Bundestag, þýska þjóðþingsins, vinnur nú úttekt á umfangi rafræns eftirlits Þjóðaröryggisstofnunar Bandaríkjanna, NSA, með þýskum borgurum. Nefndin gerði hlé á störfum sínum til að fjalla um handtöku mannsins.

Patrick Sensburg formaður nefndarinnar sagði í samtali við Financial Times að nefndarmenn væru afar varkárir og notuðu síma sem dulkóðar símtöl og hefðu læsta öryggisskápa á skrifstofum sínum til að geyma trúnaðarskjöl. Talsmaður Angelu Merkel lét hafa eftir sér að mál mannsins og ásakanir á hendur honum væru litin mjög alvarlegum augum en vildi ekki svara því hvort málið hefði verið sérstaklega rætt í símtali Merkel og Barack Obama forseta Bandaríkjanna á fimmtudag.

Þingmaðurinn Christian Flisek sem situr í nefndinni sem rannsakar hleranir NSA sagði að ef grunsemdir reyndust réttar og að umræddur starfsmaður þýsku leyniþjónustunnar hafi stundað njósnir fyrir Bandaríkjamenn þá myndi það grafa alvarlega undan trausti á milli bandarískra og þýskra stjórnvalda sem þingmenn hafi eytt mörgum mánuðum í að endurheimta.

Þá væri slíkt ekkert annað en árás á þýska stjórnskipun, að því er fram kemur í Financial Times.