Starfsmenn mótmæltu niðurskurði

Mikillar óánægju gætir meðal starfsmanna Reykjanesbæjar með fyrirhugaðar niðurskurðarhugmyndir bæjarins. Fjölmenntu bæjarstarfsmenn af því tilefni á fund bæjarstjórnar í gær og mótmæltu áformum um að lækka útgjöld vegna bifreiðastyrkja og yfirvinnu starfsmanna.

Áætlað er að minnka útgjöld til þessara liða um 250 milljónir króna. Formaður Starfsmannafélags Suðurnesja segir mikinn óróa í fólki.

Friðjón Einarsson, formaður bæjarráðs Reykjanesbæjar, segir þetta vera hluta af 900 milljóna króna hagræðingaraðgerð sem þurfi að fara í.

„Aðalástæðan fyrir þessum aðgerðum er sú að eftirlitsnefnd með fjármálum sveitarfélaga hefur krafist þess að bæjarstjórn taki á sínum málum því ekki hefur gengið sem skyldi á síðustu árum. Ef við getum ekki staðið okkur þá tekur eftirlitsnefnd yfir reksturinn,“ segir Friðjón.

Stefán B. Ólafsson, formaður Starfsmannafélags Suðurnesja, segir mikinn óróleika í kerfinu og starfsmenn uggandi um hag sinn. Lítið samráð hafi verið við starfsmenn bæjarins með þessar áætlanir.

„Það þarf fyrst og fremst að vera ákveðið samráðsferli við starfsmenn. Við erum að vinna þetta með okkar lögmönnum. Það sem þeir eru að skoða er hvort ákvæði um hópuppsagnir eigi við,“ segir Stefán.

Að sögn Stefáns er fólk á mismunandi stað í lífinu og því komi þetta misjafnlega niður á fólki.

„Þetta er áfall fyrir fólk sem er búið að vera á fínum launum í langan tíma og fer að lenda í niðurskurði núna. Tala nú ekki um ef einhverjir eru á síðustu árum starfsævi sinnar og lenda nú í að laun þeirra skerðast. Það gæti þá þýtt skerðingu á lífeyrisréttindum fólks,“ segir Stefán sem kveður samráðið vanta og að starfsmenn viti lítið um málið.

„Við erum ekki búin að sjá neina útlistun eða útfærslu á hvernig þetta verði gert. Því er starfsfólkið uggandi yfir að laun þess skerðist. Óvissan vegna ýmissa þátta er erfið en vonandi fer að skýrast hvernig þetta er hugsað.“

Friðjón Einarsson segir aðgerðirnar óumflýjanlegar.

„Reykjanesbær greiðir á sjötta hundrað milljónir á ári í bílastyrki og yfirvinnu. Við verðum að lækka þá tölu um helming. Það er ekki verið að segja upp neinum starfsmanni bæjarins eða hreyfa við föstum launum fólks.“