Funduðu með ríkisstjórninni vegna afmælis barnasáttmálans

Þann 20. nóvember næstkomandi á Barnasáttmáli Sameinuðu þjóðanna 25 ára afmæli. Af því tilefni hittu sex ungmenni, á aldrinum fjórtán til átján ára, ríkisstjórnina og ræddu um málefni er varða sáttmálann og málefni barna.

Meðal þess sem bar á góma voru menntamál, velferðarmál, heilbrigðismál og eineltismál. Sigmundur Davíð Gunnlaugsson, forsætisráðherra, sagði að ánægjulegt hefði verið að ræða við ungmennin.

„Það er alltaf gott fyrir ráðherra og þingmenn að hlusta meira á yngri kynslóðir og heyra um þeirra sýn á lífið því þau eru jú sérfræðingar á sínu sviði, að vera börn,“ sagði forsætisráðherra að afloknum fundi.

Barnasáttmáli Sameinuðu þjóðanna, eða samningur Sameinuðu þjóðanna um réttindi barnsins eins og hann kallast fullu nafni, var lagður fyrir alþjóðaþing SÞ þann 20. nóvember 1989. Hann var fullgiltur af Íslands hálfu árið 1992 en hlaut ekki lagagildi hér á landi fyrr en í febrúar í fyrra með lögum nr. 19/2013.

Hópinn skipuðu Bjartur Thorlacius, Brynhildur Kristín Ásgeirsdóttir, Kristján Helgason, Lilja Hrund Ava Lúðvíksdóttir, Lilja Reykdal Snorradóttir og Sara Mansour.