Samstaða mest í Garðabæ og Álftanesi

Íbúar í Garðabæ, á Álftanesi, í Grafarvogi og Grafarholti eru virkastir í því að standa vörð um nágranna sína gegn innbrotum. Íbúar í Hlíðunum eru hins vegar óvirkastir í því að standa vörð um nágrannana.

„Það er erfitt að segja í hverju munurinn felst, en ég held að samfélagið sé mögulega nánara í Garðabæ og á Álftanesi en í öðrum þéttbýlum hverfum á höfuðborgarsvæðinu,“ segir Jónas Orri Jónasson félagsfræðingur hjá lögreglunni á höfuðborgarsvæðinu.

12,5 prósent íbúa í Garðabæ tóku þátt í formlegri nágrannavörslu í fyrra. Í Hlíðunum tóku hins vegar aðeins 0,8 prósent íbúa þátt í formlegri nágrannavörslu. Þetta kemur fram í nýútkominni könnun sem unnin var af Félagsvísindastofnun Háskóla Íslands fyrir lögregluna á höfuðborgarsvæðinu.

Vinalegir í Grafarvogi og Grafarholti

Íbúar í Grafavogi og Grafarholti eru virkastir í vinalegu skipulagi á milli nágranna eða um 19,0 prósent en aðeins 3,3 prósent taka þátt í formlegri nágrannavörslu.

Íbúar í Garðabæ og á Álftanesi voru einnig duglegastir við að setja upp þjófavörn eða öryggiskerfi á síðasta ári en um 15,3 prósent settu slíkt upp. Hins vegar voru einungis 2,4 prósent íbúa Hlíðahverfisins sem settu upp þjófavörn eða öryggiskerfi á sama tíma.

Um 75,6 prósent íbúa Hlíðahverfisins gripu ekki til neinna aðgerða til að verja heimili sitt á síðasta ári á meðan tæplega helmingur íbúa Garðabæjar og Álftaness greip ekki til neinna aðgerða eða 49,2 prósent íbúa.



Mismiklar áhyggjur

Þess má til gamans geta að um 45,3 prósent íbúa Garðabæjar og Álftaness höfðu mjög litlar áhyggjur af því að brotið yrði gegn þeim á síðasta ári en 38,5 prósent íbúa í Hlíðunum höfðu mjög litlar áhyggjur af því að brotið yrði gegn þeim á sama tíma.

Ótti við afbrot hafði áhrif á daglegt líf um 3,9 prósenta íbúa Hlíðahverfis en einungis 1,8 prósent íbúa Garðabæjar og Álftaness höfðu sömu áhyggjur.