Ávísað oftar á sterku verkjalyfin

Ávísunum á sterk verkjalyf fjölgaði um fimm prósent milli áranna 2012 og 2013, að því er segir á vef Landlæknisembættisins. Ávísunum lyfja sem innihalda Oxycodon fjölgaði. Árið 2013 kom á markað samheitalyf verkjalyfsins OxiContin sem bæst hefur í flokk sterkra ávanabindandi lyfja á ólöglega vímuefnamarkaðnum hér á landi.

Ólafur Einarsson, verkefnisstjóri lyfjagagnagrunns hjá Landlækni, segir ávísunum á OxiContin hafa fækkað á tímabilinu eða úr 60.073 dagskömmtum í 45.756. Dagskammar samheitalyfsins hafi verið 32.115 árið 2013 þannig að samtals hafi dagskammtar lyfja sem innihalda Oxycodon verið nær 78 þúsund árið 2013. Langmest er ávísað af Parkodin forte af sterkum verkjalyfjum. Árið 2012 var ávísað 978 þúsund dagskömmtum en rúmlega milljón í fyrra.