Deilt um hreppaflutninga á austfirskum skólabörnum

Íbúar Fjarðabyggðar eru ósáttir við þær hugmyndir meirihluta bæjarstjórnar að keyra börn á milli þéttbýliskjarna í sveitarfélaginu til að mæta hagræðingarkröfu.

Íbúasamtök hafa sent frá sér ályktanir um málið. Meirihlutinn hefur fallið frá því að keyra börn frá Stöðvarfirði á Fáskrúðsfjörð. Enn eru uppi hugmyndir um að flytja börn frá Eskifirði og Fáskrúðsfirði til Reyðarfjarðar.

„Opin umræða um samfélagið okkar og að við verðum meðvituð í þeirri tímabundnu stöðu sem við erum í að fá alla til að koma að borðinu og velta því fyrir okkur saman hvernig við nýtum fjármagnið sem okkur er skammtað sem best hlýtur að vera öllum til hagsbóta,“ segir Jens Garðar Helgason, formaður bæjarráðs Fjarðabyggðar.

Jens segir verkefnin framundan ærin og menn þurfi að velta upp ýmsum möguleikum til að fjárhagsáætlun 2015 verði réttum megin við núllið.

Launahækkanir yfir áætlunum

„Laun opinberra starfsmanna hækkuðu á árinu um 8-10 prósent, mun meira en áætlanir gerðu ráð fyrir. Einnig var loðnuvertíðin hvorki fugl né fiskur sem hefur mikil áhrif á fjárhagsstöðu okkar hér í Fjarðabyggð. Við erum að reka sex grunnskóla með 13 stjórnendum og við þurfum að velta fyrir okkur hvernig við nýtum fjármagnið sem best og höldum uppi góðri þjónustu fyrir börnin okkar.“

Jens Garðar segir að öllum þessum hugmyndum hafi verið kastað fram til að reyna að fá umræðu um hlutina í bænum því fræðslumál snerti allflesta íbúa sveitarfélagsins.

„Þessu er öllu kastað fram sem hugmyndum til að fá upp umræðu. Þetta er markmið, að vera með opna og gagnsæja stjórnsýslu og fá upp umræðu í sveitarfélaginu,“ segir Jens Garðar.

Gatið er 70 milljónir króna

Í umræðu um fjárhagsáætlun 2015 í bæjarstjórn Fjarðabyggðar voru viðraðar hugmyndir til að ná sparnaði í fræðslumálum.

Bæjarstjórn stendur frammi fyrir því að þurfa að stoppa í um 70 milljóna króna gat í fjárhagsáætlun næsta árs. Til stóð að aka börnum á morgnana frá Stöðvarfjarðarskóla á Fáskrúðsfjörð. Sú hugmynd fór illa í íbúa svæðisins. Jens Garðar og Jón Björn Hákonarson, forseti bæjarstjórnar, lögðu til að það yrði ekki að veruleika.