Þrír jarðstrengir fyrir 400 milljónir

Landsnet hefur lokið samningagerð vegna umfangsmestu jarðstrengjakaupa fyrirtækisins til þessa. Samið hefur verið við sænska kapalframleiðandann NKT Cables AB um kaup á þremur jarðstrengjum vegna fyrirhugaðra verkefna á næsta ári. Þeir eru samanlagt 45 kílómetrar að lengd og ætlaðir fyrir 66 kílóvolta spennu.

Samkomulagið, sem hljóðar upp á tæplega 400 milljónir króna, var undirritað í höfuðstöðvum Landsnets í gær.

Jarðstrengirnir þrír verða notaðir til þriggja aðskilinna verkefna sem munu bæta og styrkja raforkuflutningskerfið á Suður- og Vesturlandi.

Samkomulagið var gert að undangengnu útboðsferli þar sem NKT átti lægsta tilboðið. Það felur í sér framleiðslu og flutning jarðstrengjanna til Íslands ásamt eftirliti með lagningu þeirra, tengingu og prófunum. Strengirnir verða framleiddir í verksmiðju fyrirtækisins í Falun í Svíþjóð en Orkuvirki verður undirverktaki sænska fyrirtækisins á Íslandi.