Sveitarfélög greiða sjálf fyrir raflínur í jörð

Tillaga Ragnheiðar Elínar Árnadóttur, iðnaðar- og viðskiptaráðherra, að nýjum raforkulögum getur varpað milljarðakostnaði vegna lagningar raflína í hendur sveitarfélaga. Ef flutningslínu er valinn annar staður eða önnur útfærsla en sú sem Landsnet telur réttasta er heimilt að krefja þann sem óskar slíkrar breytingar um kostnaðarmuninn leiði útfærslan til aukins kostnaðar. Þetta ákvæði laganna eru sveitarstjórnarmenn, náttúruverndarsamtök og Samband íslenskra sveitarfélaga ekki sátt við.

Markmið frumvarpsins er að kerfisáætlun fái traustan grundvöll sem er nauðsynlegt fyrir áætlun sem lýtur að mikilvægum grunnkerfum landsins. Jafnframt er það markmið frumvarpsins að einfalda fyrirkomulag leyfisveitinga þegar kemur að framkvæmdum við flutningskerfið og gera ferla skilvirkari.

Guðjón Bragason, lögfræðingur Sambands íslenskra sveitarfélaga, segir fulltrúa sambandsins hafa gert athugasemdir við þetta ákvæði á samráðsfundum um frumvarpið. Þess megi vænta að einhverjar sveitarstjórnir mótmæli því í umsagnarferlinu. „Í samráðsferlinu sögðum við okkar skoðun á þessu ákvæði. Við teljum að orðalagið sé ekki nógu skýrt og betra væri að fella þetta ákvæði úr frumvarpinu. Ekki er t.d. skilgreint nægilega hverjir þessir aðilar séu sem óska slíkra breytinga en það geta væntanlega verið ýmsir fleiri en sveitarfélögin sem falla þar undir.“

Guðjón segist aðspurður telja að ágætlega hafi verið vandað til undirbúnings frumvarpsins en hér sé augljóslega um að ræða mál sem hljóti að verða umdeilt, enda séu miklir hagsmunir í húfi. Mikilvægt sé að skýra betur í greinargerð með frumvarpinu hvaða vandamál eigi að leysa með því að leggja frumvarpið fram. Fulltrúar sambandsins hafi lagt áherslu á að standa þurfi vörð um skipulagsvald sveitarfélaga en sveitarfélögin skorist hins vegar á engan hátt undan því að taka þátt í málefnalegri umræðu um það hvernig almannahagsmunir verði tryggðir við gerð skipulagsáætlana. Ýmis atriði í frumvarpinu séu tvímælalaust til bóta. Markmið frumvarpsins sé þannig m.a. að tryggja víðtækt samráð um efni kerfisáætlunar allt frá því að undirbúningur við gerð hennar hefst, en fram til þessa hefur skort reglur um það samráðsferli.

Ragnheiður Elín Árnadóttir, iðnaðar- og viðskiptaráðherra, vildi ekki tjá sig við blaðamann þegar eftir því var leitað.