Tónleikar Bryn Terfel frestast fram á næsta ár

Vegna ófyrirsjáanlegra kringumstæðna færast einsöngstónleikar Bryn Terfel sem tilkynntir höfðu verið 10. júlí næstkomandi til Listahátíðar 2015.



Söngvarinn heimsfrægi þurfti að hætta Listahátíðartónleikum sínum í Eldborg þann 24. maí skömmu eftir að þeir hófust, vegna skyndilegra veikinda í hálsi.



Stuttu eftir að tónleikunum lauk, var tilkynnt að hann kæmi aftur 10. júlí. Nú er ljóst að vegna ófyrirsjáanlegra kringumstæðna getur ekki orðið af þeim tónleikum en Terfel, sem er einn eftirsóttasti bass-baritón söngvari heims, hefur þess í stað staðfest komu sína á Listahátíð í Reykjavík að ári, með nýja efnisskrá í farteskinu. Dagsetning tónleikanna verður tilkynnt í byrjun ágúst og hefst miðasala 1. september.



Þeir sem keyptu miða á tónleikana 24. maí og sjá sér ekki fært að sækja tónleikana að ári, geta óskað eftir endurgreiðslu frá og með deginum í dag og til 31. ágúst. Þeir sem hyggjast sækja tónleikana, þurfa ekki að gera neitt: Miðar þeirra verða endurútgefnir eftir 31. ágúst fyrir tónleikana 2015 og sendir heim.



Nánari upplýsingar um framkvæmd endurgreiðslu og endurnýjun miða fást í miðasölu Hörpu í síma 528 5050 eða um netföngin midasala@harpa.is og jona@harpa.is.