Bónus og Krónan vilja selja verkjalyf

Áhugi ríkir hjá forstjórum Haga og Kaupáss að taka upp sölu lausasölulyfja í verslunum fyrirtækjanna. Hagar reka meðal annars Bónus og Hagkaup og Kaupás rekur Krónuna, Nóatún og Kjarval á Suðurlandi.

„Við höfum verið fylgjandi auknu frelsi með þetta og þá innan þeirra laga og reglna sem væru sett,“ segir Finnur Árnason, forstjóri Haga. „Við teljum að þetta væri bæði hagræði fyrir viðskiptavini og myndi leiða til verðlækkunar.“ 

Starfandi er hópur innan Samtaka verslunar og þjónustu sem hefur barist fyrir því að auglýsa megi lausasölulyf í sjónvarpi en það er bannað samkvæmt núgildandi lögum. Hópurinn hefur einnig áhuga á að taka upp sölu lausasölulyfja í dagvöruverslunum.

Jón Björnsson, forstjóri Kaupáss, segir að reynsla hans af rekstri verslunar í Danmörku hafi sýnt að sala lausasölulyfja í dagvöruverslunum sé hægðarleikur.

„Þetta er þjónusta við neytendur. Ég get alveg sagt þér það að þetta er enginn megabisness.“ 

Kaupás rekur verslanakeðjuna Kjarval á Suðurlandi. Jón segir að þar væri ef til vill mest hagræði fyrir neytendur að hafa aðgang að lyfjum.

„Þetta er oft eina verslunin í bænum. Þú værir til dæmis að fara í ferðalag og ert með höfuðverk, sem oft gerist í útilegum, þá væri nú gott að geta farið og keypt paratabs.“ 

Rannveig Gunnarsdóttir, forstjóri Lyfjastofnunar, segir ákvörðun um breytingu á lyfjalögum liggja hjá stjórnvöldum.

„Þetta er alltaf spurning hvaða lyfjapólitísku stefnu stjórnvöld vilja hafa á hverjum tíma. Í sjálfu sér hefur Lyfjastofnun ekki skoðun á því.“

Undir þetta tekur Geir Gunnlaugsson landlæknir.

„Þessi mál hafa ekki verið sérstaklega til skoðunar hjá okkur. Þetta er pólitísk ákvörðun. Við svona ákvörðun þarf að skoða kosti og galla og meta það heildrænt hver áhrifin yrðu.“ 

Ekki náðist í Kristján Þór Júlíusson heilbrigðisráðherra við vinnslu fréttarinnar.



Rýmri heimildir í nágrannalöndunum

Sala lausasölulyfja í dagvöruverslunum er heimil í flestum þeim löndum sem Ísland ber sig saman við.

Sem dæmi má nefna að salan er heimil á öllum Norðurlöndunum að Íslandi undanskildu. Ísland og Finnland eru einu Norðurlöndin sem ekki leyfa netverslun með lausasölulyf og ekki auglýsingar í sjónvarpi.

Ísland er eina landið sem ekki leyfir samanburðarauglýsingar á lausasölulyfjum.