Tíðni reykinga tengist ekki útliti pakkans

Einsleitar umbúðir á sígarettupökkum hafa engin áhrif á tíðni reykinga. Þetta kemur í ljós í viðamikilli rannsókn sem framkvæmd var á íbúum í Ástralíu eftir að tóbaksframleiðendum var árið 2011 gert að fjarlægja lógó og önnur sérkenni af tóbakspökkum seldum þar í landi. Rannsóknin var pöntuð af Philip Morris International sem er leiðandi fyrirtæki í tóbaksframleiðslu í heiminum.

Prófessorinn Dr. Ashok Kaul sem fór fyrir rannsókninni segir að gegnsæjar rannsóknaraðferðir hafi verið notaðar sem greina minnstu breytingar.

„Við rannsökuðum mengið í þrettán mánuði eftir að lögin tóku gildi,“ útskýrði Dr. Kaul í samtali við Fréttablaðið. Dr. Kaul segir gögnin hafa verið borin saman við gögn sem safnað hafði verið í þrettán ár áður en löggjöfin tók gildi. Niðurstöðurnar voru afgerandi. Í hnotskurn þá fundum við enga breytingu á tíðni reykinga.“

Hugmyndir voru uppi á Íslandi árið 2011 að fara í þessa átt þegar Sif Friðleifsdóttir lagði fram þingsályktunartillögu um aðgerðaráætlun um tóbaksvarnir.

Áætlunin var í sjö liðum og var í þriðja lið hennar lagt til að innleiddar yrðu einsleitar umbúðir, þannig yrði „spornað við markaðssetningu tóbaksfyrirtækjanna sem með útliti tóbaksvara tengja þær jákvæðum ímyndum, eins og æsku, hreysti, ríkidæmi, karlmennsku eða kvenleika,“ að því er sagði í tillögunni.