Grjótkrabbi leggur undir sig ströndina

Grjótkrabbi, sem fyrst varð vart hér við land árið 2006, hefur nú dreift sér við strendur landsins og virðist hann hafa tekið sér bólfestu við vesturströnd landsins og við Vestfirði að sögn Halldórs Pálmars Halldórssonar, forstöðumanns Rannsóknaseturs Háskóla Íslands á Suðurnesjum.

Einnig hefur hann frétt af einum sem barst á land í Skagafirði en hann á eftir að fá það staðfest að um grjótkrabba sé að ræða. Jónas Jónasson hjá Hafrannsóknastofnun á Ísafirði sagði hins vegar að um grjótkrabba væri að ræða. Útbreiðslan er því nokkuð ör því hann fannst í Breiðafirði einungis tveimur árum eftir að hann fannst fyrst í Hvalfirðinum. Í fyrra varð hans síðan vart á Vestfjörðum.

Óvíst er hver áhrif hans geta orðið í fæðukerfinu en krabbinn étur allt sem að kjafti kemur. Enginn skortur virðist þjaka hann hvað það varðar, síst af öllu í Hvalfirði þar sem hann nær venjulega stærð á við stærstu grjótkrabba í sínum náttúrulegu heimkynnum við austurströnd Norður-Ameríku og ber því um 15 sentímetra breiðan skjöld. Þrátt fyrir nafnið heldur krabbinn sig á mjúkum botni og þurfa menn ekki að vera reyndir sjómenn til að veiða hann en krakkar á leikjanámskeiði á Ísafirði fengu einn í gildru sína í fyrradag.

Grjótkrabbi er herramannsmatur en Halldór segir eflaust nokkur ár í það enn að hægt verði að stunda hagkvæmar veiðar. „Það er margt sem kemur inn í þá mynd sem enn er ósvarað,“ segir hann. Krabbinn er þó nú þegar kominn á matseðilinn hjá veitingahúsunum Vitanum í Sandgerði og Kopar við Reykjavíkurhöfn. Ásta Guðrún Óskarsdóttir, framkvæmdastjóri Kopars, segir krabbann mjög vinsælan en þar er hann til dæmis hanteraður í kökuform.