„Ég fer á bak nánast alla daga“

„Það gekk bara mjög vel, gat stundum verið smá skrítið en mjög skemmtilegt,“ segir hinn tólf ára knapi Arnar Máni Sigurjónsson en honum verður fylgt eftir af tökuliði Kukls á Landsmót hestamanna á Gaddstaðaflötum við Hellu dagana 30. júní til 6. júlí.

„Það var bara hringt í pabba og hann fenginn til að fá mig í þetta,“ segir ungi knapinn en nú þegar hafa verið gerðir sjónvarpsþættir um undirbúning hans og undankeppni. Síðan verða einnig gerðir þættir um þátttöku hans í keppninni sjálfri og þeir klipptir jafnóðum og sýndir í Sjónvarpi Símans.

Arnar Máni var í hestamennsku þegar hann var yngri en hann segir áhugann hafa kviknað fyrir alvöru á landsmóti hestamanna árið 2011. Aðspurður hvort hann sé stressaður fyrir landsmótið segir hann stressið ekki vera byrjað að segja til sín.

„Ég fer á bak nánast alla daga,“ segir Arnar, „en ekki með hestinn sem ég ætla með á landsmót, hann fær að hvíla sig.“ Þrátt fyrir ungan aldur þykir Arnar Máni vera með efnilegustu knöpum á landsmótinu. Hann keppir nú á sínu öðru landsmóti og gerði sér lítið fyrir á dögunum þegar hann vann úrtökumótið hjá Fáki á hestinum Hlekk frá Bjarnarnesi með einkunnina 8,65, sem verður að teljast ansi gott.

Eins og áður hefur komið fram geta áhugasamir fylgst með unga knapanum á Sjónvarpi Símans á sérstakri Landsmótsrás þar sem verða beinar sjónvarpsútsendingar frá Landsmótinu ásamt tuttugu mínútna sjónvarpsþáttum um Arnar Mána.