Innlent

Mun minna fjallað um kvennafótbolta í fjölmiðlum

Erla Björg Gunnarsdóttir skrifar
Fjölmargar stelpur æfa fótbolta í yngstu flokkunum en hætta oft á unglingsárum. Þórhildur segir þær skorta fyrirmyndir. fréttablaðið/
Fjölmargar stelpur æfa fótbolta í yngstu flokkunum en hætta oft á unglingsárum. Þórhildur segir þær skorta fyrirmyndir. fréttablaðið/
Heildarhlutfall umfjöllunar um konur í knattspyrnu er 9,1 prósent í samanburði við 89,5 prósent umfjöllunar á körlum.



Þetta kemur fram í nýrri rannsókn Þórhildar Ólafsdóttur, nema í íþróttafræði við tækni- og verkfræðideild í Háskólanum í Reykjavík. Þórhildur er fyrirliði meistaraflokks ÍBV og segir sárlega vanta fyrirmyndir fyrir stúlkur sem æfa fótbolta.



„Ungar stelpur hafa byrjað í auknum mæli að æfa fótbolta en þær hætta margar á unglingsaldri. Þær þurfa eldri knattspyrnukonur til að líta upp til og hafa einhverja stefnu. Þessi rannsókn staðfestir að það er vöntun á umfjöllun um konur í íþróttum,“ segir Þórhildur.

Þórhildur Ólafsdóttir, nemi í íþróttafræði við tækni- og verkfræðideild í Háskólanum í Reykjavík, er jafnframt fyrirliði íBV í knattspyrnu og hefur æft fótbolta frá unga aldri.
Í rannsókninni var tölulegum upplýsingum á umfjöllun þriggja íslenskra vefmiðla safnað saman og síðan greindar. Vefmiðlarnir eru ruv.is, mbl.is og fotbolti.net. Þórhildur valdi eina viku sumarið 2013 til þess að greina upplýsingarnar. 



Fyrir utan það að umfjöllun um knattspyrnu karla væri mun meiri þá var hún almennt fjölbreyttari. Algengasta snið umfjöllunar kvenna var lítilleg samantekt úr leikjum þeirra. Einnig voru umfjallanir karla að meðaltali lengri hvort sem um ræddi í orðum, sekúndum eða fjölda mynda. 



„Það þarf að skoða betur ástæður þessa en það fyrsta sem manni dettur í hug er áhugaleysi. Einn fjölmiðlamaður útskýrði þetta með því að leikirnir hjá konunum væru alltaf á sama tíma og því erfitt að fjalla um þá alla. Einnig var nefnt að samfélagið hefði ekki áhuga á að lesa um kvennabolta og hann væri ekki að skila eins miklu fjármagni inn,“ segir Þórhildur og bætir við að með aukinni umfjöllun fjölmiðla gæti aukinn áhugi á knattspyrnu kvenna vaknað.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.