Af Norðurlöndum drekka Finnar og Íslendingar verst

Af Norðurlandabúum drekka Finnar mest og Íslendingar minnst að því er fram kemur í nýrri skýrslu Alþjóðaheilbrigðismálastofnunarinnar (WHO) um áfengi og heilbrigði í heiminum.

Fram kemur í skýrslunni, sem nær til allra 194 aðildarríkja WHO, að áfengisnotkun valdi dauða 3,3 milljóna manna á ári hverju.

Af öllum dauðsföllum er hlutfallið 5,9 prósent. Auk þess að stuðla að ótímabærum dauða er áfengi sagt auka líkur á að fólk þrói með sér yfir 200 sjúkdóma.

Hvorki Ísland né Finnland ná þó á topp tíu lista þeirra landa þar sem mest er drukkið í heiminum, en þar tróna þó Evrópulönd, því mest er drukkið í Evrópu.

Mest er drukkið í Hvíta-Rússlandi, 17,5 lítrar af hreinu áfengi per íbúa yfir 15 ára aldri á ári hverju. Þar á eftir koma Moldóva með 16,8 lítra, Litháen (15,4 lítrar) og Rússland (15,1 lítri).

Hér á landi er talan 7,1 lítri af hreinu áfengi per íbúa á ári, en 10,4 lítrar ef bara er horft til þeirra sem drekka á annað borð.

Finnar drekka 12,3 lítra af áfengi á mann (18,1 þeir sem drekka), Danir 11,4/12,9 lítra, Svíar 9,2/13,3 lítra, og Norðmenn 7,7/9,0 lítra á mann.

En þar með er þó ekki öll sagan sögð, því WHO mælir líka hversu "vel" er drukkið.

Hér er hlutfall óhófsdrykkju, eða það sem á ensku kallast binge drinking, þar sem mikið af áfengi er innbyrt á tiltölulega skömmum tíma, næstmest á Norðurlöndum.

Hér að ofan má sjá lista yfir 25 efstu lönd raðað eftir óhófsdrykkju þeirra sem á annað borð drekka.

Allra verst í heimi drekka Litháar, en 56,1 prósent þeirra sem þar drekka á annað borð drekka illa. Í öðru sæti er Finnland þar sem hlutfallið er 53,7 prósent.

Af aðildarríkjum WHO er Ísland svo í þrettánda sæti hvað þetta varðar með hlutfallið 34,9 prósent. Í Svíþjóð sem er í 14. sæti er hlutfallið 34,5 prósent og 33,4 í Bretlandi sem er í því fimmtánda.

Danmörk situr svo í 19. sæti á þessum skammarlista með 32,2 prósenta óhófsdrykkjuhlutfall þeirra sem á annað borð drekka.

Best Norðurlandabúa standa svo Norðmenn sig með hlutfallið 13,9 prósent, nálægt fertugasta sæti.

Til samanburðar má svo nefna að óhófsdrykkjuhlutfall þeirra Bandaríkjamanna sem á annað borð drekka er 24,5 prósent.

Sama hlutfall er 17,3 prósent í Kína, 13,0 prósent í Ástralíu og 23,1 prósent í Kanada.

Af þjóðum Vestur-Evrópu hafa Ítalir og Hollendingar allra besta stjórn á drykkju sinni samkvæmt tölum WHO.

Í Hollandi er hlutfall óhófsdrykkjufólks í hópi þeirra sem drekka 6,6 prósent og 6,2 prósent á Ítalíu.