Forseti Íslands talar ekki á Tedx

Forseti Íslands, Ólafur Ragnar Grímsson, mun ekki vera ræðumaður á ráðstefnunni Tedx Reykjavík sem fram fer í Hörpu á laugardag eins og áætlað hafði verið.

Jóhannes Martin L Sörensen er einn þeirra sem sjá um framkvæmd ráðstefnunnar. „Við fengum svar frá honum í byrjun árs með þeim fyrirvara að hann myndi vera laus en svo fengum við það staðfest fyrir mánuði að hann kæmist ekki.“ Ekki hafði verið ákveðið um hvað fyrirlestur forsetans yrði. „Við nálguðumst hann með autt blað og vildum heyra hvað hann langaði að tala um. Við vorum mjög spennt fyrir því að fá hann.“

Fá svör fengust frá forsetaembættinu um forföll forsetans. Örnólfur Thorsson forsetaritari segir að þétt dagskrá forsetans komi í veg fyrir þátttöku hans. „Það hefur legið fyrir frá því upp úr miðjum apríl að því miður gæti ekki orðið af þátttöku forseta að þessu sinni vegna margvíslegra skuldbindinga, athafna og anna, hérlendis og erlendis, á síðustu vikum. Forseti hefur því ekki haft tök á því að undirbúa þátttöku sína og málflutning með nægilega ítarlegum hætti.“ Forsetinn verður ekki erlendis um helgina.

Ræðumenn á Tedx Reykjavík verða meðal annarra Gísli Marteinn Baldursson og Ólafur Stefánsson handboltakappi.