Vinnustöðvun takist ekki að semja í dag

Kennarar leggja niður vinnu í grunnskólum á morgun takist ekki samningar milli Félags grunnskólakennara og Samninganefndar Sambands íslenskra sveitarfélaga í dag. Fundað var hjá sáttasemjara í gær og á mánudag. Ekki hafði þá verið fundað síðan á miðvikudag í síðustu viku.

„Okkur hefur þótt skorta áhuga og vilja hjá sveitarstjórnarmönnum en maður pínir engan að samningaborði. Eftir að Bandalag háskólamanna og Félag framhaldsskólakennara sömdu vorum við í ágætis vinnutörn með þetta en svo kom hlé. Við hefðum viljað meiri kraft í þetta fyrr,“ segir Ólafur Loftsson, formaður Félags grunnskólakennara.

Viðræður síðustu vikur hafa snúist um nýtt vinnumat á starfi grunnskólakennara. „Við eru komnir langt með það og svo koma launaliðirnir. Þar eru markmiðin skýr. Við viljum fá sömu laun og aðrar háskólamenntaðar stéttir sem hafa sambærilega menntun og bera sambærilega ábyrgð.“

Ólafur tekur fram að reynt verði af fremsta megni að ljúka samningagerð áður en til vinnustöðvunar kemur.

„Ég hef ekki heyrt í neinum sem hefur ekki skilning á því að menn þurfi að gera þetta. Foreldrar hafa auðvitað áhyggjur og hvetja menn til að semja en við verðum ekki vör við annað en að þeir hafi á þessu skilning.“

Skipulagðir hafa verið útifundir víða um land komi til vinnustöðvunar á morgun og félagsmenn í Félagi grunnskólakennara munu krefja frambjóðendur til sveitarstjórna svara um stefnu þeirra í kjaramálum kennara.

Vinnustöðvanir hafa einnig verið boðaðar á miðvikudag í næstu viku og á þriðjudag í þar næstu viku.