Gistiskálar og tjaldstæði færð frá Landmannalaugum í skipulagskeppni

„Hugsunin er að endurheimta gróður og upphaflega ásýnd Landmannalauganna sjálfra,“ segir Guðmundur Ingi Gunnlaugsson, oddviti Rangárþings ytra, um fyrirhugaða samkeppni um deiliskipulag Landmannalauga.

Rangárþing ytra hefur tvisvar fengið styrk úr framkvæmdasjóði ferðamannastaða vegna samkeppninnar; þriggja milljóna króna styrk í fyrra og tíu milljóna króna styrk í ár.

„Ég reikna með að verulegur meirihluti af þessum tíu milljónum fari í verðlaunafé og við viljum fá hugmyndir sem víðast að því betur sjá augu en auga,“ segir Guðmundur.

Gistingin verði fjóra kílómetra í burtu

Þörfin á að deiliskipuleggja Landmannalaugar er afar knýjandi að sögn Guðmundar. „Þarna er ekki viðunandi aðstaða eins og er til að taka á móti þeim fjölda sem hefur verið og það hefur ekki verið hægt að byggja neitt upp vegna þess að deiliskipulag vantar.“

Í rammaskipulagi fyrir hálendið norðan Mýrdalsjökuls er gert ráð fyrir að meginþjónustan með tjaldstæði og gistiskálum færist út fyrir Landmannalaugasvæðið á stað sem heitir Sólvangur, þremur til fjórum kílómetrum frá náttúruvættinu.

„En þá er verið að tala um að inni í Laugunum sjálfum verði upplýsingar, gestastofa og búningsaðstaða til þess að fara ofan í laugina,“ útskýrir Guðmundur.

Miklir hagsmunir og skiptar skoðanir

Oddvitinn játar því að skiptar skoðanir séu um fyrirkomulagið þótt engar „viðamiklar athugasemdir“ hafi komið fram þegar rammaskipulagið var samþykkt. Ferðafélag Íslands eigi mikla hagsmuni með gistiskála og salernishús í Landmannalaugum. Grunnhugmyndin sé að slík þjónusta fari mögulega í Sólvang.

„Meginhugsunin er að halda svæðinu sem ósnortnustu þannig að fegurð og andblær staðarins njóti sín sem best. En það verður áfram tekið á móti fólki í Landmannalaugum, hugmyndin er alls ekki að því verði hætt eða fólki meinaður aðgangur,“ segir Guðmundur sem vonast til að samkeppninni verði ýtt úr vör í sumar.

„Það er mikilvægt að nýta síðari hluta sumarsins þegar allt er orðið greiðfært þannig að fólk sem ætlar að taka þátt í samkeppninni geti skoðað svæðið sem best,“ segir Guðmundur. Félög arkitekta og landslagsarkitekta muni eiga fulltrúa í dómnefnd auk þess sem samstarf verði við Umhverfisstofnun. „Það verður reynt að hafa gott yfirbragð og góðan faglegan blæ á þessu öllu saman.“