Tæp fjögur prósent íbúa með fjárhagsaðstoð

Á árinu 2013 nutu alls 557 einstaklingar fjárhagsaðstoðar í 14.500 manna samfélagi Reykjanesbæjar. Útgjöld bæjarins vegna þessa voru 275 milljónir eða um 104 milljónir umfram áætlun.

„Þannig var þessi liður einn stærsti óvissuþátturinn í rekstri bæjarfélagsins,“ segir Hjördís Árnadóttir, framkvæmdastjóri fjölskyldu- og félagssviðs Reykjanesbæjar. „Eðli þessara útgjalda er líkt og þjónusta á bráðadeild sjúkrahúsa, við höfum lítið val. Fólk í neyð á rétt á slíkri aðstoð lögum samkvæmt.“

Fjölgun þeirra sem fá aðstoð hefur verið í öllum aldurshópum en mest hjá fólki á aldrinum 18-29 ára, og frá árinu 2007 hefur þeim fjölgað um 250% á fjárhagsaðstoð. Fyrir utan fjölgunina er þróunin sú að fólk er lengur á bótunum.

„Margir í þessum aldurshópi eiga ekki aðra framfærslumöguleika, hafa aldrei unnið sér inn atvinnuleysisbótarétt og eiga ekki auðsótt á vinnumarkaðinn. Hér hefur verið lögð áhersla á að skapa þessu fólki úrræði, til dæmis í samstarfi við Vinnumálastofnun, en sá hængur er á að þessi úrræði eru tímabundin og betur má ef duga skal,“ segir Hjördís. 

Á síðasta ári misstu 146 manns úr Reykjanesbæ bótarétt hjá Vinnumálastofnun og er áætlað að 158 fullnýti hann á þessu ári. 

„Fjárhagsáætlun fyrir árið 2014 miðaðist við að nú færum við að rétta úr kútnum og voru 200 milljónir áætlaðar í fjárhagsaðstoð. En nú á fyrstu þremur mánuðum ársins erum við búin með tæpar hundrað milljónir þannig að við sjáum fram á að fara langt yfir áætlun.“

Hjördís segir ekki alla sem missa bótarétt fá fjárhagsaðstoð frá bænum, en það sé ekki minna áhyggjuefni hvað verði um þann hóp sem er hvorki talinn með atvinnulausum né bótaþegum bæjarins. Fjölskyldufólk þurfi að treysta á framfærslu frá einum í stað tveggja. 

„Það hefur aldrei verið jafn mikil eftirspurn eftir félagslegu leiguhúsnæði og nú, og margir eru í verulegum vanda. Fólk gistir hjá ættingjum og vinum svo vikum og mánuðum skiptir. Hjá félagsþjónustunni er unnið að lausnum, en þær geta verið tímafrekar þegar fólk á hvergi heima,“ segir Hjördís.