Innlent

Stjórnvöld skipuðu ráðgjafahóp með leynd

Brjánn Jónasson skrifar
Sigmundur Davíð Gunnlaugsson forsætisráðherra segir sex manna ráðgjafahóp um afnám gjaldeyrishaftanna hafa verið skipaðan í lok nóvember í fyrra.
Sigmundur Davíð Gunnlaugsson forsætisráðherra segir sex manna ráðgjafahóp um afnám gjaldeyrishaftanna hafa verið skipaðan í lok nóvember í fyrra. Vísir/Daníel
Farið var leynt með skipan hóps ráðgjafa sem nýverið skilaði ráðherranefnd um afnám gjaldeyrishafta tillögum sínum þar sem skipan hópsins þótti varða við efnahagslega mikilvæga hagsmuni ríkisins. Þetta kemur fram í svari Sigmundar Davíðs Gunnlaugssonar forsætisráðherra við fyrirspurn á Alþingi.

Ráðgjafarnir voru sex talsins, og voru skipaðir í lok nóvember í fyrra. Ekki var tilkynnt opinberlega um skipan þeirra, né var skipunarbréf þeirra gert opinbert fyrr en í svari Sigmundar við fyrirspurn Össurar Skarphéðinssonar, þingmanns Samfylkingarinnar.

Ráðgjafahópurinn hafði frjálsar hendur um verkaskiptingu og fundarhöld. Engar fundargerðir voru ritaðar á fundum hópsins, en fulltrúi forsætisráðuneytisins sem sat fundina ritaði minnispunkta um það sem fram fór til afnota fyrir ráðuneytið, segir í svarinu.

Ráðgjafarnir áttu að vera uppspretta hugmynda um afnám gjaldeyrishaftanna, og áttu að auki að smíða tillögur í kringum hugmyndirnar.

Össur Skarphéðinsson, þingmaður Samfylkingarinnar, spurði um ráðgjafahóp um afnám gjaldeyrishaftanna.Vísir/Daníel
„Þeir eru ráðgjafar ráðherranefndar um efnahagsmál en hafa ekki verið skipaðir í nefnd eða starfshóp. Ráðgjafar hafa ekki ákvörðunarvald í neinum málum er viðkoma afnámi hafta og eru ekki opinberir starfsmenn,“ segir í svari Sigmundar.

Í ljósi þessa telur hann reglur um jafnt hlutfall karla og kvenna í stjórnum og nefndum hins opinbera ekki eiga við, en ráðgjafarnir eru allir karlmenn.

Össur spurði um þóknun ráðgjafanna, en var aðeins svarað að hluta. Tímakaup ráðgjafanna var 17 þúsund krónur. Samið var um fastan tímafjölda á mánuði, en ekki kemur fram í svarinu hversu margir tímarnir voru. Þá var greitt sérstaklega fyrir skýrsluskrif og sérstakar athuganir umfram fastan tímafjölda.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.