„Hugsunin á bak við vefinn er að hjálpa fólki að komast út úr einverunni og hann er fyrir fólk á öllum aldri frá átján ára,“ segir Björn Ingi Halldórsson, hönnuður vináttusíðunnar vinur.is. Vefsíðan var opnuð 25. janúar en á vefnum geta einstaklingar fundið vini á svipuðum aldri og með svipuð áhugamál.

„Viðbrögðin hafa verið vonum framar. Á þessum fáu dögum hafa 150 notendur skráð sig,“ segir Björn en hann er líka hönnuður stefnumótasíðunnar Makaleit.

„Ég er búinn að vera með makaleit.is í bráðum ár. Ég hef fengið nokkra tölvupósta frá fólki sem hefur viljað skrá sig á Makaleit en ekki gert það því það var að leita meira að vini en ástarsambandi. Þannig vaknaði hugmyndin að vinur.is því það er fullt af einmana fólki sem situr eitt heima hjá sér og liggja þar alls konar ástæður að baki,“ segir Björn.

Á vinur.is geta notendur skilgreint hvernig vini þeir leita að og aðeins séð þann hóp. Þá geta notendur einnig sett inn smáauglýsingar ef þeir leita sér að félaga á sérstakan viðburð, í íþróttaiðkun eða í ferðalag svo dæmi séu nefnd. Það kostar ekkert að skrá sig á vefinn en eins og með makaleit.is fara allir notendur í gegnum samþykktarferli til að sporna gegn því að vefurinn sé misnotaður. Björn nýtur sín í starfinu, bæði sem sambands- og vináttumiðlari.

„Ég hef fengið ófáa tölvupósta frá notendum Makaleitar sem hafa fundið ástina. Það er hvatning fyrir mig að halda áfram á þessari braut og tengja þá sem eru vinalausir.“