Sextán beiðnir um nálgunarbann afgreiddar árið 2013

Lögreglan á höfuðborgarsvæðinu afgreiddi sextán beiðnir um nálgunarbann á síðasta ári og voru þær samþykktar í 75 prósent tilfella. Það eru heldur fleiri beiðnir en lögreglan afgreiddi árið áður en þá voru afgreiddar beiðnir níu. 67 prósent þeirra voru samþykktar.

Þetta kemur fram í upplýsingum sem Vísir óskaði eftir frá lögreglu um fjölda mála. Aðrar stofnanir, svo sem barnavernd, geta líka sótt um nálgunarbann og einnig önnur embætti lögreglunnar. Upplýsingarnar gefa því aðeins mynd af fjölda mála lögreglunnar á höfuðborgarsvæðinu.

Eins og fram kom í Kastljósi í gær og greint var frá á Vísi hefur Ásdís Hrönn Viðarsdóttir ítrekað kært hótanir og brot á nálgunarbanni sem sett var á fyrrverandi sambýlismann hennar síðasta haust. Hún segir nálgunarbannið ekki hafa borið nokkurn árangur og gagnslaust ef lögreglan bregðist ekki við því.

Þau svör fengust frá Stefáni Eiríkssyni lögreglustjóra að lögreglan gæti ekki tjáð sig um einstök mál.

Hvert nálgunarbann er jafnan byggt á nokkrum atvikum að því er fram kemur í upplýsingum frá lögreglunni. Ekki liggi fyrir hve mörg tilvikin eru í öllum þeim beiðnum sem lögreglan afgreiðir. Sé tekið mið af þeim málum þar sem upplýsingar voru fyrirliggjandi megi gera ráð fyrir því að fimm til sjö tilvik heimilisofbeldis eða annarra brota liggi að baki hverri beiðni.