Kúabændur mega mjólka eins mikið og þeir mögulega geta

Heyskapur bænda á Suðurlandi hefur gengið brösulega vegna mikillar vætu síðustu vikur þó flestir séu búnir með fyrri slátt. Grasspretta hefur verið með allra besta móti. Sigurður Ingi Jóhannsson, landbúnaðarráðherra vonast eftir góðum heyjum í kýrnar svo þær geti mjólkað meira.

Langflestir bændur á Suðurlandi ef ekki allir eru búnir með fyrri slátt og það styttist óðum í að seinni sláttur hefjist. Grasspretta hefur verið með allra mesta móti en veðrið hefur þó ekki verið hagstætt bændum til þessa, miklar rigningar og oft á tíðum leiðindaveður. Sigurður Ingi er þó bjartsýnn fyrir hönd bænda.

„Í sjálfu sér er staðan frábær, það er búið að vera gott veður um allt land, hér á Suðurlandi var enginn vetur, þannig að grasspretta er með miklum ágætum. Menn hafa núna á síðustu dögum orðið stressaðir ef ekki myndi rætast um þurrk því þá færi gras að spretta úr sér. Ég von að það takist bara mjög vel til því þá getum við horft björtum augum á aukna mjólkurframleiðslu,“ segir Sigurður Ingi.

Hann segir að kúbændur megi mjólka eins og þeir geta, það sé enginn kvóti á því enda mikil eftirspurn eftir hverskyns mjólkurafurðum.

„Já, nú þurfa bændur að mjólka eins mikið og hægt er og eiga hvergi að slaka á í sinni framleiðslu, halda henni á fullum dampi, líka yfir sumarið því að eftirspurnin er þvílík hér innanlands, sem er frábært, auðvitað vegna aukins fjölda ferðmanna og líka vegna aukinnar neyslu landsmanna, breytingar á neysluháttum og svo eru auðvitað sóknarfæri í útflutning, sem menn hafa verið að byggja upp,“ segir ráðherrann.