Áfall að missa fasta yfirvinnu

Stefán Benjamín Ólafsson, formaður Starfsmannafélags Suðurnesja, telur líklegt að einhverjir starfsmenn bæjarins muni endurskoða stöðu sína í kjölfar fregna af uppsögnum á fastri yfirvinnu og akstursstyrkjum.

Tillögur þess efnis voru samþykktar af bæjarráði fyrir helgi. Fastir akstursstyrkir skulu afnumdir en enn verði greitt fyrir akstur samkvæmt akstursdagbók og unna yfirvinnu.

„Þetta er mikið áfall fyrir alla en þó sérstaklega þá sem missa fasta yfirvinnu,“ segir Stefán Benjamín Ólafsson, formaður Starfsmannafélags Reykjanesbæjar. „Hátt í 200 starfsmenn verða þarna af tekjum og í ofanálag munu útsvar og fasteignaskattur hækka.“

Böðvar Jónsson, bæjarráðsulltrúi Sjálfstæðisflokksins og sá eini sem greiddi atkvæði gegn tillögunni, segir aðgerðirnar gerðar í alltof miklum flýti. Frekari greininga hafi verið þörf á því hvaða áhrif þær hefðu, hve mikil og á hverja. Ekki hefði verið þörf á aðgerðum fyrr en fyrir mánaðarlok og hefði átt að nýta þann tíma.

„Þetta hefur legið lengi fyrir og búið er að greina afleiðingarnar í bak og fyrir. Það er til að mynda langt síðan yfirmenn voru upplýstir um þetta,“ segir bæjarstjórinn Kjartan Már Kjartansson. Aðgerðin sé því miður aðeins kubbur í stærra púsluspili.